'அல்-அஸாத் ஆட்சி கவிழ்ப்பு: அமெரிக்கா, இஸ்ரேலின் கூட்டு சதி'

சிரியாவில் அல்-அஸாதின் ஆட்சியை கிளர்ச்சியாளர்கள் கவிழ்த்தது அமெரிக்காவும் இஸ்ரேலும் கூட்டாக நடத்திய சதிச் செயல் என்று ஈரானின் தலைமை மதகுரு அயதுல்லா கமேனி குற்றஞ்சாட்டியுள்ளார்.

இது குறித்து தலைநகர் டெஹ்ரானில் புதன்கிழமை நடைபெற்ற நிகழ்ச்சியில் அவர் பேசியதாவது: சிரியாவில் பஷார் அல்-அஸாத் தலைமையிலான அரசு அகற்றப்பட்டது, அமெரிக்கா மற்றும் யூத ஆக்கிரமிப்புவாதிகளின் (இஸ்ரேல்) கூட்டு சதி என்பது சந்தேகத்துக்கு இடமில்லாத உண்மை. அதற்கான முழு ஆதாரங்கள் எங்களிடம் உள்ளன.

இது தவிர, சிரியாவின் மற்றொரு அண்டை நாடும் அல்-அஸாத் அரசைக் கவிழ்ப்பதில் பங்கு வகித்தது. அத்தகைய நடவடிக்கைகளை அந்த நாடு தொடர்ந்து மேற்கொண்டுவருகிறது.

கிளர்ச்சியாளர்களால் ஆபத்து என்று ஈரான் உளவு அமைப்புகள் அல்-அஸாத் அரசிடம் கடந்த மூன்று மாதங்களாகவே எச்சரித்துவந்தது. ஆனால் எதிரிகளை அவர் அலட்சியப்படுத்தி விட்டார்.