அரசமைப்புச் சட்டத்தை பலவீனப்படுத்த முயற்சி

அரசமைப்புச் சட்டத்தை கடந்த பத்தாண்டுகளாக பாஜக அரசு தொடர்ந்து பலவீனப்படுத்த முயற்சி மேற்கொண்டு வருகிறது என வயநாடு காங்கிரஸ் எம்.பி. பிரியங்கா காந்தி மக்களவையில் வெள்ளிக்கிழமை குற்றஞ்சாட்டினார்.

நாடாளுமன்றத்தில் தனது கன்னிப் பேச்சை வெள்ளிக்கிழமை நிகழ்த்திய அவர், 'அரசமைப்புச் சட்ட புத்தகம் என்பது சங் பரிவார் அமைப்பின் விதி புத்தகமல்ல என்பதை பிரதமர் மோடியால் புரிந்து கொள்ள முடியவில்லை' எனவும் அவர் தெரிவித்தார்.

அரசமைப்புச் சட்டத்தின் 75 ஆண்டுகள் நிறைவையொட்டி மக்களவையில் வெள்ளிக்கிழமை தொடங்கிய விவாதத்தில் பிரியங்கா 32 நிமிஷங்கள் பேசியதாவது:

அரசமைப்புச் சட்ட புத்தகத்தை வணங்கும் பிரதமர் மோடி சம்பல், மணிப்பூர், ஹாத்ராஸ் என எங்கு வன்முறை நடந்தாலும் அதை கண்டும் கொள்வதில்லை.

அரசமைப்புச் சட்டபுத்தகம் என்பது நாட்டுடையது என்பதையும் அது சங் பரிவார் அமைப்பின் விதி புத்தகமல்ல என்பதையும் பிரதமர் மோடி இன்னும் புரிந்துகொள்ளவில்லை. நீதி, ஒற்றுமை, கருத்துரிமையின் பாதுகாப்புக் கவசமாக திகழும் அரசமைப்புச் சட்டத்தை கடந்த பத்தாண்டுகளாக பாஜக அரசு பலவீனப்படுத்த முயற்சி மேற்கொண்டு வருகிறது.