திருவண்ணாமலையில் 2,668 அடி உயர மலையில் ஏற்றப்பட்ட மகா தீபம்

பல லட்சம் பக்தர்கள் தரிசனம்

திருவண்ணாமலை ஸ்ரீ அருணாசலேஸ்வரர் கோயில் கார்த்திகை மகா தீபத் திருவிழாவையொட்டி, 2,668 அடி உயர மலை மீது வெள்ளிக்கிழமை மாலை 6 மணிக்கு மகா தீபம் ஏற்றப்பட்டது. லட்சக்கணக்கான பக்தர்கள் வழிபாடு செய்தனர்.

திருவண்ணாமலை ஸ்ரீ அருணாசலேஸ்வரர் கோயில் கார்த்திகை தீபத் திருவிழா, கடந்த 4-ஆம் தேதி கொடியேற்றத்துடன் தொடங்கியது. விழாவின் 7-ஆவது நாளான கடந்த 10-ஆம் தேதி பஞ்ச ரதங்களின் தேரோட்டம் நடைபெற்றது.

பரணி தீபம்: விழாவின் 10-ஆவது நாளான வெள்ளிக்கிழமை பரணி தீபம், மகா தீபம் ஏற்றும் நிகழ்வுகள் நடைபெற்றன. அதிகாலை 2 மணிக்கு கோயில் நடை திறக்கப்பட்டு மூலவர் ஸ்ரீ அருணாசலேஸ்வரருக்கு சிறப்பு அபிஷேக, ஆராதனைகள் நடைபெற்றன.

தொடர்ந்து, 2.45 மணி முதல் 3.20 மணி வரை பரணி பூஜை நடைபெற்றது. பின்னர், 3.40 மணிக்கு கோயில் மூலவர் சந்நிதியில் பரணி தீபம் ஏற்றப்பட்டது. தொடர்ந்து, மூலவர் சந்நிதி எதிரே உள்ள பிரதோஷ நந்திக்கு வலப்புறம் பஞ்ச (ஐந்து) மடக்குகளை வைத்து சிவாச்சாரியர்கள் தீபம் ஏற்றி, மடக்கு பூஜை செய்தனர்.