பிரிஸ்பேன் டெஸ்ட் 'டிரா'; முடித்து வைத்த மழை

இந்தியா - ஆஸ்திரேலியா அணிகள் மோதிய 3-ஆவது டெஸ்ட் ஆட்டம், புதன்கிழமை 'டிரா'-வில் முடிந்தது. ஆட்டத்தின் முடிவுக்கு மழை முக்கியப் பங்கு வகித்தது.

இதையடுத்து, இரு அணிகளும் மோதும் பார்டர்-காவஸ்கர் கோப்பை டெஸ்ட் தொடர், தற்போது 1-1 என சமநிலையிலேயே நீடிக்கிறது. இந்த ஆட்டத்தில் ஒரு கட்டத்தில் தோல்வியை எதிர்நோக்கிய இந்திய அணி, அதிலிருந்து தப்பித்துள்ளது.

முன்னதாக, கடந்த 14-ஆம் தேதி தொடங்கிய இந்த ஆட்டத்தில் டாஸ் வென்ற இந்தியா, பந்துவீச்சை தேர்வு செய்தது. ஸ்டீவ் ஸ்மித், டிராவிஸ் ஹெட் ஆகியோரின் அசத்தலான சதத்தால் ஆஸ்திரேலியா 445 ரன்கள் சேர்த்து ஆட்டமிழந்தது. இந்திய பௌலர்களில் ஜஸ்பிரீத் பும்ரா முக்கியப் பங்காற்றினார்.

பின்னர் தனது இன்னிங்ஸை விளையாடிய இந்தியா, 51 ரன்களுக்கே 4 விக்கெட்டுகளை இழந்து தடுமாறியது. எனினும் தொடக்க வீரர் கே.எல்.ராகுல், மிடில் ஆர்டரில் கடைசியாக வந்த ரவீந்திர ஜடேஜா ஆகியோரின் அரைசதம் கடந்த நிதானமான ஆட்டத்தால் மீட்சி கண்ட இந்தியா, ஃபாலோ-ஆன் சூழலை தவிர்த்தது.