தமிழகத்தின் உரிமைகள்: மத்திய அரசுக்கு மக்கள் மீண்டும் பதிலடி கொடுப்பர் முதல்வர் மு.க.ஸ்டாலின் எச்சரிக்கை

தமிழகத்தின் உரிமைகளை மத்திய அரசு தராவிட்டால், தமிழக மக்கள் உரிய நேரத்தில் மீண்டும் தக்க பதிலடி கொடுப்பர் என்று முதல்வரும், திமுக தலைவருமான மு.க.ஸ்டாலின் கூறியுள்ளார்.

இது தொடர்பாக அவர் சனிக்கிழமை வெளியிட்ட அறிக்கை: நாடாளுமன்றத்தின் குளிர்காலக் கூட்டத் தொடர் நவ.25 தொடங்கி, டிச.21-இல் முடிவுற்றுள்ளது. இந்தக் கூட்டத் தொடரில் வீறுகொண்ட வீரர்களாக திமுகவின் நாடாளுமன்ற உறுப்பினர்கள் முழங்கி இருக்கின்றனர். திமுகவின் செயல்பாடுகளைப் பார்த்து, நாடே வியந்து கொண்டிருக்கிறது.

தமிழகத்தின் நலனுக்காக குரல் கொடுப்பது, மாநில உரிமைகள் தொடர்பான பிரச்னைகளை எழுப்பி அவையின் கவனத்தை ஈர்ப்பது ஆகிய இரண்டையும் வெற்றிகரமாகச் செய்து காட்டி இருக்கின்றனர். மற்ற மாநில எம்.பி.க்களுக்கு முன்னோடிகளாக திமுக எம்.பி.க்கள் செயல்படுவதைப் பார்த்து, திமுகவின் தலைவராக நான் எண்ணி எண்ணி மகிழ்கிறேன். நாட்டை உலுக்கும் முக்கியப் பிரச்னைகளில் திமுகவின் நிலைப்பாடு என்ன என்பதை நாடே உன்னிப்பாக கவனிக்கும் நிலைக்கு திராவிடப் பேரியக்கம் வளர்ந்திருப்பதை நினைத்தும் பெருமையாக இருக்கிறது.