ஒரு நூற்றாண்டுத் தியாக வரலாறு

விடுதலைக்குப் பின்னர் தொழிலாளர்கள், விவசாயிகள் உரிமைகளுக்காகவும் சுரண்டலை எதிர்த்தும் - தீண்டாமை, ஜாதி - மத உயர்வு தாழ்வுகளுக்கெதிராகவும் பெண்ணடிமை உள்ளிட்ட சமூகக் கொடுமைகளுக்கு எதிராகவும் மனித உரிமைகளுக்காகவும் குரல் கொடுத்தும் போராடியும் வருகிறது கம்யூனிஸ்ட் இயக்கம்.

- த. ஸ்டாலின் குணசேகரன்

இந்திய கம்யூனிஸ்ட் கட்சியின் அமைப்பு மாநாடு 1925-ஆம் ஆண்டு டிசம்பர் 26-ஆம் தேதி கான்பூரில் நடைபெற்றது. ஆண்டுதோறும் அந்நாளை 'அமைப்பு தினம்' என்று அவ்வியக்கத்தினர் கொண்டாடி வருகின்றனர். இன்று அக்கட்சிக்கு நூறாவது ஆண்டு தொடக்கம்.

நூறாண்டுகளுக்கு முன்பு இந்திய அளவில் வடநாட்டில் நடைபெற்ற ஒரு உலகப் பார்வை கொண்ட கம்யூனிஸ்ட் இயக்க அமைப்புமாநாட்டிற்கு ஒரு தமிழர் தலைமை ஏற்றது தகைசால் தமிழர்களுக்கு தனித்த பெருமையாகும். ஆம்... சென்னையைச் சேர்ந்த ஒரு மீனவக் குடும்பத்தில் பிறந்து கீர்த்திமிக்க வழக்குரைஞராக வளர்ந்த - சிந்தனையாளர், கட்டுரையாளர், இதழாளர், தொழிற்சங்கத் தலைவர், விரிந்த வாசிப்பாளர், அறிவியல் கருத்துகளை தமிழ் மண்ணில் வேரூன்ற வைக்க அரிதின் முயன்று உழைத்த வித்தியாசமான அரசியலாளர், போராளி என்ற பன்முக ஆளுமைமிக்க ம.சிங்காரவேலர்தான் கான்பூர் மாநாட்டிற்குத் தலைமை ஏற்றவர்.

அவரின் அன்றைய உரை பெயரளவுக்கு ஒரு மரியாதை நிமித்தமான உரையாக அல்லாமல், நன்கு திட்டமிட்டுத் தயாரிக்கப்பட்ட ஆழமான அரசியல் உரையாகவும், கம்யூனிஸ்ட் சித்தாந்தம் ஏன் இந்தியாவுக்குத் தேவைப்படுகிறது என்பதை தெள்ளத் தெளிவாக விளக்குகிற ஓர் ஆய்வுரையாகவும், நன்கு நேரம் எடுத்து நிகழ்த்தப்பட்ட நீண்ட ஒரு விளக்கவுரையாகவும் அமைந்தது.

அச்சிறப்புமிக்க உரை காற்றில் கலந்து மறைந்து விடாமல் அச்சடிக்கப்பட்டு ஆவணமாக்கப்பட்டதுதான் சிறப்பினும் சிறப்பு. அவ்வுரை சிங்காரவேலரின் மேதமையையும் கம்யூனிஸத்தின் தனிச் சிறப்புகளையும் இந்தியாவில் கம்யூனிஸ்ட் கட்சி ஏன் தேவைப்படுகிறது என்பதற்கான விளக்கங்களையும் ஒருசேரப் பறைசாற்றுகிற வரலாற்று ஆவணம்.

இந்தியாவில் கம்யூனிஸ்ட் இயக்கம் ஒரு கட்சி வடிவில் திடீரென்று 1925-இல் தோன்றிவிடவில்லை. 1917 ஆம் ஆண்டு வெற்றி பெற்ற ரஷியப் புரட்சி இந்திய இளைஞர்கள் பலரை எழுச்சி கொள்ளச் செய்தது. மாற்றுச் சிந்தனைக்கு ஆற்றுப்படுத்தியது.

ரஷியாவில் ஏற்பட்ட தலைகீழ் மாற்றத்திற்கு அடிப்படையாக இருந்த மார்க் சீய லெனினியத் தத்துவத்தின்பால் இந்திய இளைஞர்கள் பலர் ஈர்க்கப்பட்டனர். இவர்களின் கட்டுக்கடங்காத தேசபக்தியும் பீறிட்டுக்கிளம்பிய புரட்சிகர உணர்வும்தான் அத்தகைய மடைமாற்றத்திற்கு வித்துக்களாக விளங்கின.