மாணவி பாலியல் வன்கொடுமை வழக்கில் கைதான நபர் திமுக உறுப்பினர் அல்ல

அண்ணா பல்கலை. மாணவி பாலியல் வன்கொடுமை வழக்கில் கைதான நபர் திமுக உறுப்பினர் இல்லை என்று சட்டத் துறை அமைச்சர் எஸ்.ரகுபதி கூறினார்.

இதுகுறித்து அவர் திமுக தலைமை அலுவலகமான அண்ணா அறிவாலயத்தில் செய்தியாளர்களுக்கு வியாழக்கிழமை அளித்த பேட்டி: ஞானசேகரன் என்பவர் பாலியல் வன்கொடுமை சம்பவத்துக்குக் காரணமானவராக கண்டறியப்பட்டு இருக்கிறார். புகார் கொடுத்து ஐந்து மணி நேரத்துக்குள் குற்றவாளி கைது செய்யப்பட்டு, சிறையில் அடைக்கப்பட்டுள்ளார். காவல் துறை உரிய நடவடிக்கையை உடனடியாக எடுத்தது. இந்த சம்பவத்தை மூடி மறைக்க வேண்டிய அவசியம் முதல்வருக்கோ, திமுக அரசுக்கோ சிறிதளவும் கிடையாது. கைது செய்யப்பட்ட நபர் திமுகவின் அடிப்படை உறுப்பினர் கூட கிடையாது.