கன்னியாகுமரியில் கண்ணாடி இழை கூண்டு பாலம் திறப்பு

கன்னியாகுமரி கடலில் விவேகானந்தர் பாறை - திருவள்ளுவர் சிலை ஆகியவற்றை இணைக்கும் வகையில் ரூ.37 கோடி மதிப்பில் அமைக்கப்பட்டுள்ள கண்ணாடி இழை கூண்டு பாலத்தை முதல்வர் மு.க.ஸ்டாலின் திங்கள்கிழமை மாலை திறந்து வைத்தார்.

கன்னியாகுமரி கடலில் உள்ள திருவள்ளுவர் சிலை, கடந்த 1.1.2000-இல் அப்போதைய முதல்வர் கருணாநிதியால் திறந்துவைக்கப்பட்டது. இந்தச் சிலை அமைக்கப்பட்டு 25 ஆண்டுகள் நிறைவடைவதை முன்னிட்டு, தமிழக அரசின் சார்பில் திருவள்ளுவர் சிலை வெள்ளி விழா கன்னியாகுமரியில் திங்கள்கிழமை தொடங்கியது.

வெள்ளி விழா நிகழ்ச்சிகளில் பங்கேற்க திங்கள்கிழமை பிற்பகலில் கன்னியாகுமரிக்கு வந்த முதல்வர் மு.க.ஸ்டாலின், மாலை 4.50 மணிக்கு தனிப்படகு மூலம் திருவள்ளுவர் சிலைக்கு சென்றார். பின்னர், திருவள்ளுவர் சிலைக்கு 'பேரறிவுச் சிலை' என்ற பெயர் சூட்டி, அதற்கான கல்வெட்டை முதல்வர் திறந்து வைத்தார்.

தொடர்ந்து திருவள்ளுவர் சிலையையும் விவேகானந்தர் பாறையையும் இணைத்து கட்டப்பட்டுள்ள கண்ணாடி இழை கூண்டு பாலத்தை திறந்து வைத்து, பாலத்தின் மறுமுனை வரை நடந்து சென்றார்.

இதைத் தொடர்ந்து, திருவள்ளுவர் சிலையின் பாதங்களில் மலர் தூவி முதல்வர் அஞ்சலி செலுத்தினார். திருக்குறள் நெறி பரப்பும் 22 தகைமையாளர்களுக்கு சிறப்பு பரிசுகளை முதல்வர் வழங்கினார்.