ரயில் முன் தள்ளி மாணவி கொலை: இளைஞருக்கு மரண தண்டனை

சென்னை பரங்கிமலையில் கடந்த 2022-ஆம் ஆண்டு ரயில் முன் கல்லூரி மாணவியைத் தள்ளி கொலை செய்த வழக்கில் கைதான இளைஞர் சதீஷுக்கு மரண தண்டனை விதித்து மகளிர் சிறப்பு நீதிமன்றம் தீர்ப்பளித்தது.

சென்னையை அடுத்த ஆலந்தூர் காவலர் குடியிருப்பைச் சேர்ந்தவர் மாணிக்கம். சொந்தமாக கார் வைத்து வாடகைக்கு ஓட்டி வந்தார். இவரது மனைவி ராமலட்சுமி, ஆதம்பாக்கம் காவல் நிலையத்தில் தலைமை காவலராகப் பணியாற்றினார்.

இத்தம்பதியின் மூத்த மகள் சத்தியபிரியா (20), தியாகராய நகரில் உள்ள தனியார் கல்லூரியில் பிசிஏ 3-ஆம் ஆண்டு படித்து வந்தார். இவர், அதே பகுதியைச் சேர்ந்த ஓய்வு பெற்ற உதவி ஆய்வாளர் தயாளனின் மகன் சதீஷ் (31) என்பவரைக் காதலித்து வந்தார்.