நாட்டின் 57% பள்ளிகளில் மட்டுமே கணினி வசதி!

நாட்டின் 57.2 சதவீத பள்ளிகளில் மட்டுமே மாணவர்களுக்கான கணினி வசதி இருப்பதும், 53.9 சதவீத பள்ளிகளில் மட்டுமே இணைய வசதி இருப்பதும் மத்திய கல்வி அமைச்சகத்தின் 2023-24 ஆம் கல்வியாண்டுக்கான 'யுடிஐஎஸ்இ' தரவுகளில் தெரிய வந்துள்ளது.

ஒருங்கிணைந்த மாவட்ட கல்வி தகவல் அமைப்பானது (யுடிஐஎஸ் இ-பிளஸ்) நாடு முழுவதும் உள்ள பள்ளிக்கல்வி தரவை தொகுப்பதற்கு மத்திய கல்வி அமைச்சகத்தால் பராமரிக்கப்படும் தரவுத்திரட்டல் தளமாகும்.

24.8 கோடி மாணவர்கள்: இந்த தகவல் அமைப்பில் பதிவு செய்யப்பட்ட தரவுகளின் அடிப்படையில், 2023-24 ஆம் கல்வியாண்டில் நாட்டின் மொத்த மாணவ, மாணவியரின் எண்ணிக்கை 24.8 கோடி ஆகும். இவர்கள் 10,97,973 அரசு மற்றும் அரசு உதவிப் பெறும் பள்ளிகள் உள்பட 14,71,891 பள்ளிகளில் பயில்கின்றனர். 24.8 கோடி மாணவர்களுக்கு கற்பிக்கும் பணியில் 98,07,600 ஆசிரியர்கள் ஈடுபட்டுள்ளனர்.

குறைந்த சேர்க்கை: 2023-24 ஆம் கல்வியாண்டில் தொடக்கக் கல்வி முதல் இடைநிலை கல்வி வரையிலான மொத்த மாணவர் சேர்க்கை முந்தைய ஆண்டைவிட 37 லட்சம் குறைந்துள்ளது.