வார்டு மேம்பாட்டு நிதி ரூ. 60 லட்சமாக உயர்வு

நாய்களுக்கு தடுப்பூசி, மாணவர்களுக்கு புதிய சலுகை

சென்னை மாநகராட்சி மன்ற உறுப்பினர்களுக்கான வார்டு மேம்பாட்டு நிதி ரூ.50 லட்சத்தில் இருந்து ரூ.60 லட்சமாக உயர்த்தப்படும் என்று மேயர் பிரியா அறிவித்துள்ளார்.

மேலும், நாய்களுக்கு தடுப்பூசி போடும் திட்டம் செயல்படுத்தப் படும்;மாணவர்களுக்கு புதிய சலுகைகள் வழங்கப்படும் உள்ளிட்ட பல்வேறு அறிவிப்புகளையும் அவர் வெளியிட்டார்.

நிதிநிலை அறிக்கை தாக்கல் செய்வதற்கு முன்பு பல்வேறு துறை சார்ந்த முக்கிய திட்டங்களை மேயர் ஆர்.பிரியா அறிவித்தார். அதன் விவரம்;

கல்வி: பத்தாம் வகுப்பு முதல் பிளஸ் 2 பயிலும் மாணவர்கள் போட்டித்தேர்வில் கலந்து கொள்ள ஊக்குவிக்கப்படுவார்கள். மாணவர்களுக்கு செய்தித்தாள் வாசிக்கும் பழக்கத்தை ஊக்குவித்து, அதன் அடிப்படையில் விநாடி வினா போட்டி நடத்தப்படும். அரசு பொதுத் தேர்வில் சிறந்த மதிப்பெண்கள் பெறுவதற்காக 'வளமிகு ஆசிரியர் குழு' அமைக்கப்படும். 6 முதல் பிளஸ் 2 வரை பயிலும் மாணவர்களின் புவியியல் பாடத்தை எளிதாக புரிந்து கொள்ளும் வகையில் வகுப்பறையில் புவி உருண்டை வழங்கப்படும். சென்னையில் உள்ள 414 மழலையர் வகுப்பறைகள் மற்றும் 81 உயர்நிலை, மேல் நிலைப் பள்ளிகளில் மின்னணு பலகை அமைக்கப்படும்.