திருவண்ணாமலை மகா தீபம்: மலை மீது ஏற பக்தர்களுக்கு இந்த ஆண்டு அனுமதி இல்லை!

மண் சரிவால் 7 பேர் இறந்த சம்பவம் எதிரொலி!!

திருவண்ணாமலையில் மண் சரிவால் 7 பேர் பலியானதை அடுத்து இந்த ஆண்டு மகா தீபம் ஏற்றப்படும் போது மலை மீது ஏற பக்தர்களுக்கு அனுமதி வழங்கப்படாது என்று அதிகாரிகள் தெரிவித்தார்கள்.

திருவண்ணாமலை அருணாச்சலேஸ்வரர் கோயிலில் ஒவ்வொரு ஆண்டும் கார்த்திகை தீப திருவிழா சிறப்பாக கொண்டாடப்படுகிறது.திருக்கார்த்திகை நாளில் அதிகாலையில் கோவில் வளாகத்தில் பரணி தீபம் ஏற்றப்படும்.

அன்றைய தினம் மாலையில் 2,668 அடி மலை உச்சியில் மகா தீபம் ஏற்றப்படும்.இதை காண்பதற்காக தமிழக முழுவதிலும் இருந்து லட்சக்கணக்கான பக்தர்கள் வருவார்கள்.

அண்டை மாநிலங்களில் இருந்தும், சில வெளிநாடுகளில் இருந்தும் கூட மக்கள் வருவார்கள்.இந்த ஆண்டுக்கான விழா கடந்த 4-ஆம் தேதி கொடியேற்றத்துடன் தொடங்கியது.

நாளை தேர் ஊர்வலம் நடக்கிறது. டிசம்பர் 13-ஆம் தேதி மகா தீபம் ஏற்றப்படும்.