હુસ્નની જાળમાં ફસાવી કરોડો રૂપિયાના તોડ કરતી અમદાવાદની શાતિર હસીના ઝડપાઈ

સ્વરૂપવાન યુવતીએ ભાવનગરના ડોક્ટર પાસે બે કરોડની ખંડણી માગી: કરોડપતિ બનવાનાં સપનાં જોતી યુવતીએ આખા રાજ્યમાં પોતાનું નેટવર્ક ઊભું કર્યું

અમદાવાદ, શનિવાર

રાતોરાત રૂપિયા કમાવવાની લાલચમાં આજે યુવાનો આડા રસ્તે ચઢી રહ્યા છે, જેમાંથી એક રસ્તો હની ટ્રેપનો પણ છે. સોશિયલ મીડિયા પર આધેડ તેમજ માલેતુજાર લોકોને પોતાના હુસ્નની જાળમાં ફસાવીને લાખો રૂપિયાના તોડ કરતી અનેક યુવતીઓ સક્રિય થઇ છે, જેનો પર્દાફાશ અનેક વખત થયો છે, પરંતુ ભાવનગર પોલીસે એક એવી સ્વરૂપવાન યુવતીની ધરપકડ કરી છે કે જે લાખો રૂપિયા નહીં, પરંતુ કરોડો રૂપિયાનો તોડ કરવામાં વિશ્વાસ રાખે છે. અમદાવાદના નિકોલમાં રહેતી કાજલ વાછાણીએ ભાવનગરના એક ડોક્ટરને પોતાના હુસ્નની જાળમાં ફસાવીને બે કરોડ રૂપિયાની માગણી કરી હતી. ડોક્ટરે રૂપિયા નહીં આપતાં પોલીસ ફરિયાદ કરી હતી, જેના કારણે કાજલ તેમજ તેની ગેંગના સભ્યો સકંજામાં આવ્યા હતા.