અમદાવાદમાં ઠંડીનું જોર વધ્યું: વહેલી સવારે ઝાકળ સાથે ૧૨.૭ ડિગ્રી તાપમાને ધ્રુજાવ્યા

નલિયામાં ૭.૫ ડિગ્રી, રાજકોટમાં ૯ ડિગ્રી ઠંડી

અમદાવાદ સહિત રાજ્યભરમાં ગત રાતથી ઠંડીનું જોર વધ્યું છે. અમદાવાદમાં આજે વહેલી સવારે ઝાકળ પડવાની સાથે ૧૨.૭ ડિગ્રી લઘુતમ તાપમાને શહેરીજનોને ધ્રુજાવી દીધા હતા. ઉલ્લેખનીય છે કે ગુજરાતમાં હાલ વેસ્ટર્ન ડિસ્ટર્બન્સની અસર વર્તાઈ રહી છે અને તેના કારણે વાતાવરણમાં મોટો પલટો જોવા મળ્યો છે. રાજ્યભરમાં છેલ્લા ત્રણ દિવસથી ઠંડીનું જોર થોડું ઘટ્યું હતું, પરંતુ આજે સવારથી ફરી એક વખત ઠંડીનો સપાટો જોવા મળ્યો છે. કચ્છનું નલિયા આજે પણ ૭.૫ ડિગ્રી લઘુતમ તાપમાન સાથે રાજ્યનું સૌથી ઠંડું શહેર બન્યું છે, જ્યારે સૌરાષ્ટ્રના રાજકોટમાં ૯ ડિગ્રી ઠંડી નોંધાતાં લોકો થથરી ઊઠ્યા હતા.