158 ஆவது வருடத்தில் இலங்கை பொலிஸ்

நூறு வருடங்களுக்கு மேல் ஒரு நீண்ட வரலாற்றுக்கு உரித்துடைய இலங்கை பொலிஸ் 2024ஆம் ஆண்டு செப்டெம்பர் 03 ஆம் திகதியன்று 158ஆவது பொலிஸ் தினத்தைக் கொண்டாடுகின்றது. 1866 செப்டெம்பர் 03ஆம் திகதி ஜி.டபிள்யூ.

ஆர்.கெம்பல் பொலிஸ் மா அதிபராக நியமிக்கப்பட்டார். அன்றையதினமே அரசியலமைப்பின் படி இலங்கை பொலிஸ் ஆரம்பிக்கப்பட்ட தினமாகக் கருதப்படுகின்றது.

எவ்வாறாயினும், 1602ஆம் ஆண்டு ஒல்லாந்தர்களால் கரையோரப் பிரதேசங்களை கைப்பற்றப்பட்ட பின்னர் 1650ஆம் ஆண்டு கொழும்பு மாநகரசபையினால் இரவு நேரம் நகரத்தைப் பாதுகாப்பதற்காக நகரப்பாதுகாப்பு உத்தியோகத்தர்களை நியமிக்கும் யோசனை முன் வைக்கப்பட்டு, அது நிறைவேற்றப்பட்டது. அதற்கமைய இரவு நேரம் ரோந்து நடவடிக்கைக்காக நகரப் பாதுகாப்பு உத்தியோகத்தர்கள் நால்வர் நியமிக்கப்பட்டனர்.

இதுவே இலங்கை பொலிஸாரின் முதலாவது கடமையாகச் சுட்டிக்காட்டப்படுகின்றது.

இலங்கையை 1796 பெப்ரவரி 16ஆம் திகதி ஒல்லாந்தர்களிடமிருந்து பிரித்தானியர்களால் கைப்பற்றப்பட்டது. அன்றிலிருந்து சட்டம் மற்றும் ஒழுங்கு பிரித்தானிய இராணுவத்தினர்களால் நிருவகிக்கப்பட்டது. பொலிஸாரின் மேற்பார்வைக்காகவும் மேலதிக பணிக்காகவும் அரச நிதிப்பற்றாக்குறை ஏற்பட்டது. அதனால், அப்போதைய ஆளுநரான பிரெட்ரிக் நோர்த், பிரதம நீதியரசரின் ஒப்புதலுடன், பொலிஸ் மேற்பார்வை செய்யும் பொறுப்பை நீதிவான் மற்றும் நீதியரசர்களுக்கு வழங்கப்பட்டது. மேலும், நாட்டை மறு சீரமைப்பு செய்வதற்காக ஆற்றல் மிக்க ஒரு நபரைத் தேடிய ஆளுநர் பிரெட்ரிக்நோர்த் இந்தியாவில் பொலிஸார் தனது கடமையைப் பின்பற்றும் நடவடிக்கைகளைக் கண்காணித்தார்.

இதன்போது மும்பாய் பொலிஸ் உயர் அதிகாரியாகக் சுடமையாற்றிய ஜி.டபிள்யூ.ஆர். செம்பலிடம் இப்பணியை ஒப்படைக்குமாறு மும்பை ஆளுநரால் பரிந்துரைக்கப்பட்டது.