பாதிக்கப்பட்டவர்களுக்கான நீதி மற்றும் உரிமையை உறுதிப்படுத்துங்கள்

மக்களின் உரிமையைக் கேள்விக் குறியாக்கும் நடவடிக்கைகளை உடன் நிறுத்துவதன் மூலம் பாதிக்கப் பட்டவர்களுக்கான நீதி மற்றும் உரிமையை உறுதிப்படுத்துமாறு கிழக்கு மாகாண சிவில் வலையமைப்பு, ஜனாதிபதி அனுரகுமார திசாநாயக்கவிடம் கோரிக்கை விடுத்துள்ளது.

- எஸ்.கீதபொன்கலன்

அகம் மனிதாபிமான வள நிலையத்தின் ஏற்பாட்டில், சர்வதேச மனித உரிமைகள் தினத்தையொட்டி, திருகோணமலையில் புதன்கிழமை (11) நடத்தப்பட்ட நடை பவனியின் பின் ஜனாதிபதி அனுரகுமார திசாநாயக்கவுக்கு அனுப்பிவைப்பதற்காக, கிழக்கு மாகாண ஆளுநர் பேராசிரியர் ஜயந்தலால் ரத்னசேகரவிடம் மகஜர் கையளிக்கப்பட்டது.

அந்த மகஜரிலேயே மேற்கண்டவாறு கோரப்பட்டுள்ளது.

சர்வதேச மனித உரிமை தினத்தையொட்டி, திருகோணமலை, மட்டக்களப்பு மற்றும் அம்பாறை மாவட்டங்களைச் சேர்ந்த தமிழ், சிங்கள, முஸ்லிம் ஆகிய மூவின மக்கள், பெண்கள் தலைமை தாங்கும் குடும்பங்கள், வலிந்து காணாமல் ஆக்கப்பட்டவர்களின் உறவினர்கள், படுகொலை செய்யப்பட்டவர்களின் உறவினர்கள், விவசாயிகள், மீனவர்கள், பெண்கள், சிவில் செயற்பாட்டாளர்கள் அடங்கலாக பல்வேறு வகையில் பாதிக்கப்பட்ட, பாதிக்கப்பட்டு வருகின்ற நாங்கள், 2024 மார்கழி 11ஆம் திகதி திருகோணமலை குளக்கோட்டன் மண்டபத்தில் ஒன்று கூடி எமது ஏகோபித்த கோரிக்கைகளை தங்களுக்குச் சமர்ப்பிக்கின்றோம்.