కల్టీలతో రోగాలు

మెరిసేదంతా బంగారం కానట్లే' నిగనిగలాడుతూ నోరూరించే పండ్లన్నీ తినడానికి పనికిరావని ప్రజలు గమనించాల్సిన రోజులివి. ప్రపంచమంతా కల్తీతో నిండిపోయింది.

- తరిగొప్పుల విఎల్లెన్ మూర్తి

తాను బాగుపడితే చాలు, మిగతావారు నాశనమైపోయినా పర్లేదనే ఆలోచన సమాజాన్ని కృంగదీస్తుంది.

బియ్యం పిండికి రంగు కలిపితే అది పసుపు.. పాలపొడిలో నీళ్లు కలిపితే చిక్కటిపాలు. అరటికాడ గుజ్జతో అల్లం వెల్లుల్లి పేస్తు. రసాయనాలు రుద్దితే నిగనిగలాడే పండ్లు, నాణ్యతలేని నూనెతో బియ్యానీ, నూడుల్స్, నాన్వెజ్ వేపుళ్లు, ఇలా చెప్పుకుంటూపోతే 'కల్తీ కలర్' పూసుకున్న తినుబండారాలను నోరూరించుకుంటూ తింటున్నాం. ఆరోగ్యాన్ని సంరక్షించేందుకు అవసరమవుతున్న పండ్లకు సైతం ప్రమాదకర రసాయనాలను రుద్దుతున్నారు. కుంకుమ, నూనెలు, పప్పులు, చక్కెర, బియ్యం, ఇతర సరుకులను కల్తీ చేస్తున్నారనే ఆరోపణలున్నాయి. సౌందర్యపోషణకు వాడే ప్రముఖ ఫేమ్లకు సంబంధించి నకిలీల దందా మార్కెట్లో నిరాటంకంగా సాగుతోంది. దేశవ్యాప్తంగా దుకాణాల్లో అమ్ముడవుతున్న నకిలీ ఫేమ్లను గుర్తించడం కష్టసాధ్యమే. పప్పులు, పండ్లు, కూరలే కాదు.ఇప్పుడు మార్కెట్లో కల్లీకాని సరకులే కనిపించడం లేదు. నెయ్యి, నూనెలు, సౌందర్య ఉత్పత్తులు, సుగంధ ద్రవ్యాలు,మిఠాయిలు, శీతల పానీయాలు, పచ్చళ్లు, పాలు, నీళ్లు.. ఇలా ఏది చూసినా కల్తీమయమే. కల్తీలు, నకిలీల నివారణకు పలు ప్రభుత్వ శాఖలున్నా అక్రమ వ్యాపారాలకు తెరపడడం లేదు. ఎంత సంపాదించినా తిండి విషయంలో రాజీ పడితే బతుకుబండి సాగదు గనుక నాణ్యమైన పండ్లు, కూరలు, నూనెలు, బియ్యం, ఇతర పదార్థాలు కొనాలని అందరూ భావిస్తారు. ఈ భావనే కల్తీ వ్యాపారులకు బలంగా మారుతోంది.అధిక లాభాలకు ఆశపడి ప్రజల ఆరోగ్యానికి హాని కలిగించే రసాయనాలు, నాసిరకం వస్తువులు కలిపి కొందరు వ్యాపారులు జేబులు నింపుకుంటున్నారు. సాధారణ ప్రజలే కాదు చదువుకున్న వారు సైతం ఆహార పదార్థాల్లో కల్తీ జరిగిన విషయాన్ని గుర్తించలేకపోతున్నారు. ఒకప్పుడు మామాడి పండ్లను మగ్గించేందుకు మాత్రమే కార్బయిడ్ వంటి విషపూరిత రసాయనాలు వినియోగించేవారు.ఇప్పుడు అన్ని రకాల పండ్లను రసాయనాలతో కృత్రిమంగా మగ్గించి విక్రయిస్తున్నారు. దీంతో ఏ పండ్లను కొనాలన్నా జనం భయపడే పరిస్థితి నెలకొంది.