సాహితీ ప్రస్థానంలో 'పురిపండా'

మ హాభారతం, రామాయణం, భాగవతం మూడింటినీ వాడుక భాషలో రాసిన పురిపండా అప్పలస్వామి, తెలుగు సాహిత్యంలో అభ్యుదయ ఉద్యమానికి సారధ్యం వహించిన తొలి తరం సాహితీవేత్తగా ఖ్యాతి పొందారు.

- జయసూర్య

మహాభారతం, రామాయణం, భాగవతం మూడింటినీ వాడుక భాషలో రాసిన పురిపండా అప్పలస్వామి, తెలుగు సాహిత్యంలో అభ్యుదయ ఉద్యమానికి సారధ్యం వహించిన తొలి తరం సాహితీవేత్తగా ఖ్యాతి పొందారు. 1926 మే 6న పురిపండా, వడ్డాది సీతారామాంజనేయులు, శ్రీశ్రీ ముగ్గురూ కలిసి స్థాపించిన కవితా సమితి నాటి తెలుగు నవ్య సాహిత్యంలో కొత్త కాంతి ప్రసరింపచేసింది. నాటి గ్రాంథికవాదులు, వ్యవహారికవాదులు, సనాతన, నవ్య, అతినవ్య, అన్ని పంథాల సాహితీవేత్తలు సభ్యులుగా కవితా సమితి పాతిక పైగా గ్రంథ ప్రచురణలు, వైశాఖి సంచికలు,సభలు, సమావేశాలు, సమ్మేళనాలు అభ్యుదయ సాహితీ సేవలందించింది. ఉత్తరాంధ్ర శ్రీకాకుళం, ఒరిస్సా, విశాఖపట్నం, విజయనగరం, బరంపురం ప్రాంతాలలో నాటి తెలుగు సాహితీ సమారాధకునిగా అప్పలస్వామి విశేష సేవలందించారు.1925 విశాఖలో కర్రా సీతారామయ్య స్థాపించిన 'స్వశక్తి' వారపత్రిక సహాయ సంపాదకునిగా వున్న అప్పలస్వామి, అప్పుడు 15 ఏళ్ల వయస్సు వున్న శ్రీశ్రీ గీతమాలిక 'దివ్యలోచనములు' తొలి రచన ప్రచురింపచేసారు. 1904 నవంబరు 13న శ్రీకాకుళంలో జన్మించిన 'పురిపండా' స్వయంకృషితో హిందీ, బెంగాల్, ఒరియా, ఇంగ్లీష్, సంస్కృతం, ఉర్దూ భాషలలో ప్రావీణ్యం పొందారు. తొలి రచనలు త్రిలింగ, ఆంధ్రపత్రిక, జ్యోతి (బరంపురం) పత్రికలలో వచ్చాయి.