గాంధీజీపై డాక్యుమెంటరీ

జాతిపిత గాంధీజీపై ఆయన రోజుల్లోనే తొలిసారిగా డాక్యుమెంటరీ తీసి చరిత్ర సృష్టించిన ఎ. కె. చెట్టియార్ తమిళంలో యాత్రా సాహిత్యం అనే నూతన సాహిత్య ప్రక్రియకు మార్గదర్శి.

- యామిజాల జగదీశ్

జాతిపిత గాంధీజీపై ఆయన రోజుల్లోనే తొలిసారిగా డాక్యుమెంటరీ తీసి చరిత్ర సృష్టించిన ఎ. కె. చెట్టియార్ తమిళంలో యాత్రా సాహిత్యం అనే నూతన సాహిత్య ప్రక్రియకు మార్గదర్శి.

1911 నవంబరు మూడో తేదీన తమిళనాడులోని కారైక్కుడి సమీపంలో గల కోట్టయూరులో జన్మించిన ఎ. కె. చెట్టియారుకి తల్లిదండ్రులు పెట్టిన పేరు కరుప్పన్. బాల్యంలో తిరువణ్ణామలైలో చదువుకున్న ఈయనకు చిన్నప్పటి నుంచే రాయడం పట్ల ఆసక్తి ఎక్కువ. అలాగే గాంధీజీ అంటే గౌరవం, అభిమానం.

పదిహేడో యేట ఈయన రాసిన 'శారదాంబాళ్ - సిరు తమాష్' అనే కథ ఆనంద విగటన్ అనే తమిళ పత్రికలో అచ్చయ్యింది. ఈ పత్రిక స్థాపనలోనూ ఈయన ఎంతగానో సహకరించారు.

1930లో బర్మాలో ధనవణిగన్ అనే మాసపత్రికకు నిర్వాహక సంపాదకుడిగా ఉండి ఇతను 1935లో జపాన్ ఇంపీరియల్ ఆర్ట్స్ కేంద్రంలో చేరి ఫొటోగ్రఫీలో శిక్షణ పొందారు. అక్కడి నుంచి న్యూయార్క్ వెళ్లి ఫొటోగ్రఫీ ఇన్స్టిట్యూట్లో చేరి ఒక సంవత్సరం డిప్లొమా చేశారు.