ധന്യമാക്കും ഭയരഹിത ജീവിതം

എന്തിനും ഏതിനും ഉണ്ടാകുന്ന അകാരണമായ ഭയം മൂലം ജീവിതത്തിന് യാതൊരു ഗുണവും ലഭിക്കുകയില്ല. ജീവിതമാകുന്ന യുദ്ധഭൂമിയിൽ ജീവിച്ചു ചില സന്ദർഭങ്ങളിൽ പ്രതിരോധിച്ചും തീർക്കേണ്ടതണ് നമ്മുടെ ജന്മം. അല്ലാതെ, ഭയപ്പെട്ടുകഴിഞ്ഞാൽ ആ ജീവിതത്തിന് എന്ത് അർത്ഥമാണുള്ളത്? 

- സംഗീത മധു

പല ഭാഷകളിൽ അപാരജ്ഞാനമുണ്ടായിരുന്ന ഒരു പണ്ഡിതൻ ജീവിച്ചിരുന്നു. ജന്മനാ ധനികനല്ലെങ്കിലും ദയാലുവും മറ്റുള്ളവരെ സഹായിക്കുന്നതിൽ തൽപ്പരനുമായിരുന്നു. ഏത് പ്രതികൂല സാഹചര്യത്തിലും "ഓം' എന്ന പ്രണവമന്ത്രം ചുണ്ടുകളിൽ സദാ ഉച്ചരിച്ചു കൊണ്ടേയിരിക്കും.

ഒരു ചരിത്രകാരനൊപ്പമായിരുന്നു പണ്ഡിതൻ ജോലിചെയ്തു വന്നിരുന്നത്. അദ്ദേഹം ഒരു പുരാവസ്തു ഗവേഷകനും കൂടിയായിരുന്നു.

 പല ദേശങ്ങളിൽ സഞ്ചരിക്കുകയും അവിടെയുള്ള ക്ഷേത്രങ്ങളിലേയും ഗുഹകളിലേയും ശിലാലിഖിതങ്ങളിൽ ചരിത്രപരമായ അന്വേഷണം നടത്തുകയായിരുന്നു അയാളുടെ പ്രധാന ജോലി. ഈ ചരിത്രകാരനും കൂട്ടുകാർക്കുമൊപ്പം പട്ടണത്തിൽ യാത്ര ചെയ്യേണ്ടി വന്ന പണ്ഡിതൻ ഒരിക്കൽ ഒരു കൊടുംകാട്ടിൽ കൂടാരം കെട്ടി പാർക്കാനിടയായി.