ഹൃദയത്തുടിപ്പായി അയ്യപ്പസ്വാമി എം. ജയചന്ദ്രൻ

മതമൈത്രിയുടെ, സമഭാവനയുടെ അതിരുകൾ ഇല്ലാത്ത ഭക്തിയുടെ നാളുകൾ ആശംസിക്കുന്നു.

- എസ്.പി.ജെ

ചിന്മയ മുദ്രയാണ് ഹൃദയത്തിലുള്ളത്. ആദ്യം അയ്യപ്പനെ കാണുന്നത് 9 വയസ്സ് പ്രായമുള്ളപ്പോഴാണ്. ആദ്യശബരിമല യാത്രയേക്കാൾ ആവേശമാണ് ഇപ്പോഴും അയ്യപ്പസന്നിധിയണയാൻ. 'തത്ത്വമസി' എന്നത് ശബരിമലയുടെ മാത്രം പ്രത്യേകതയാണ്. സാക്ഷാൽ അയ്യപ്പസ്വാമിയെ 'സ്വാമി' എന്നാണ് സംബോധന ചെയ്യുന്നത്. ഭക്തനേയും "സ്വാമി' എന്ന് വിളിക്കുന്നു. ഇത് രണ്ടും രണ്ടല്ല, രണ്ടും ഒന്നാണെന്നത് വാസ്തവമാകുന്നത് ശബരിമലയിൽ മാത്രം. ദൈവിക ചൈതന്യം പ്രകൃതിയെ എത്രത്തോളം ഹൃദയഹാരിയാക്കിത്തീർത്തിരിക്കുന്നു എന്നതിന്റെ നേർക്കാഴ്ചയാണ് ശബരിമല. ചുറ്റിലും നിറയുന്ന ഹരിതാഭമാർന്ന പ്രകൃതിയിലേക്ക് വിലയം ചെയ്തുകൊണ്ടാണത്രേ അവിടെ അയ്യപ്പസ്വാമി ഭക്തർക്ക് അനുഗ്രഹം ചൊരിയുന്നത്.

ശബരിമല അയ്യപ്പനുമായുള്ള ബന്ധം നന്നേ ചെറുപ്പത്തിലേ തുടങ്ങിയിരുന്നു. കുട്ടിയായിരിക്കുമ്പോൾ കടുത്ത പനി ബാധിച്ച് തീരെ അവശനായി കിടക്കുന്ന നേരത്ത് "സ്വാമിയേ ശരണം അയ്യപ്പാ...' എന്ന് വിളിക്കുമായിരുന്നെന്ന് അമ്മ പറഞ്ഞ് കേട്ടറിവുണ്ട്. കാലക്രമേണ അയ്യപ്പഭക്തി യുടെ തീവ്രത കുറഞ്ഞ് ഗുരുവായൂരപ്പന്റെ കടുത്തഭക്തനായി..! എങ്കിലും എന്നിലെ ആധാരശക്തിയായി എന്നും സാക്ഷാൽ ശ്രീധർമ്മശാസ്താവ് ഉണ്ടായിരിക്കണം എന്ന് വിശ്വസിക്കുന്നു.

ശബരിമലയ്ക്ക് എത്ര തവണ പോയിട്ടുണ്ട് എന്ന് ചോദിച്ചാൽ കൃത്യമായി പറയാനാവില്ല. 18 വയസ്സ് തികയും മുമ്പ് ഇരുപതിലധികം തവണ അയ്യപ്പസന്നിധിയിൽ എത്തിയിട്ടുണ്ട്. എറണാകുളം FACT ൽ ഉദ്യോഗസ്ഥനായിരുന്ന അമ്മാവൻ ജയതിലകനാണ് ഗുരുസ്വാമിയായി എന്നെ ശബരിമലയ്ക്ക് കൊണ്ടുപോകുന്നത്. കുട്ടിയായിരിക്കുമ്പോൾ 7 ദിവസം വ്രതം നോറ്റാണ് മലകയറുന്നത്. സമപ്രായക്കാരായ ബന്ധുക്കളും, സുഹൃത്തുക്കളും അമ്മാവന്റെ സുഹൃത്തുക്കളും ഉൾപ്പെടെ പന്ത്രണ്ടോളം അയ്യപ്പന്മാർ ചേർന്ന സംഘമായിട്ടാണ് യാത്ര.