ഞാൻ അഭിനയിക്കാൻ കാത്തിരിക്കുന്നു - മോഹിനി

അഭിനയിക്കാനെത്തി രണ്ടുവർഷത്തിനു ശേഷമാണ് സിനിമയെ കരിയറായി ഞാൻ സ്വീകരിച്ചത്

- അജയ്കുമാർ

മോഹിനി- തൊണ്ണൂറുകളിൽ മലയാള സിനിമയിലെ മോസ്റ്റ് വാണ്ടഡ് നായിക നടിയായിരുന്നു. വിവാഹാനന്തരം അഭിനയത്തോടു വിടപറഞ്ഞ് വിദേശത്ത് കുടുംബജീവിതത്തിൽ ശ്രദ്ധ കേന്ദ്രീകരിച്ചിരുന്ന മോഹിനി ഇപ്പോഴിതാ വീണ്ടും അഭിനയിക്കാനുള്ള ആഗ്രഹവുമായി തിരിച്ചെത്തിയിരിക്കുന്നു.

തമിഴിൽ "ഈറമാന റോജാവേ' എന്ന സിനിമയി ലൂടെയായിരുന്നു തുടക്കം. ആ സിനിമയുടെ അത്ഭുതവിജയവും പാട്ടുകൾക്ക് ലഭിച്ച സ്വീകരണവും മോഹിനിയെ തെന്നിന്ത്യൻ സിനിമയ്ക്കുതന്നെ പ്രിയങ്കരിയാക്കി. മലയാളത്തിൽ തമ്പി കണ്ണന്താനം സംവിധാനം ചെയ്ത നാടോടികളിൽ മോഹൻലാ ലിന്റെ നായികയായി എത്തിയതോടെ മലയാള സിനിമാ പ്രേമികളുടേയും പ്രിയങ്കരിയായി മോഹിനി. അങ്ങനെ മലയാള സിനിമയിലെ നായികനിരയിലെ അവിഭാജ്യഘടകമായി മാറി. ഒൻപതുവർഷത്തിൽ തെന്നിന്ത്യൻ ഭാഷകളിൽ നൂറിൽപരം സിനിമകളിൽ നായികയായി റെക്കോർഡ് സൃഷ്ടിച്ചു.

നാടോടി, വരം, ഗസൽ, സൈന്യം, കാണാക്കിനാവ്, കുടമാറ്റം, പഞ്ചാബി ഹൗസ്, ഉല്ലാസപ്പൂങ്കാറ്റ്, പട്ടാഭിഷേകം, വേഷം എന്നിങ്ങനെ കുറേയേറെ മലയാള സിനിമകളിൽ അഭിനയിച്ച് മലയാളി മനസ്സിൽ ചേക്കേറി. എന്തായാലും വീണ്ടുമൊരു അങ്കത്തിനുള്ള ബാല്യമുണ്ടെന്ന പ്രതീക്ഷയുമായിട്ടാണ് മോഹിനി എത്തുന്നത്. അടുത്തിടെ ചെന്നൈയിൽ എത്തിയ മോഹിനിയുമായി ഒരു കൂടിക്കാഴ്ച നടത്തിയപ്പോൾ അവർ പറഞ്ഞുതുടങ്ങി.