പ്രധാനപ്പെട്ട മെയിൽ കളറിലാക്കാം

സ്മാർട് ഫോണിലെ കൂടുതൽ ടെക്നിക്കുകൾ അറിയാനും വിവിധ ആവശ്യങ്ങൾ സ്മാർട്ടായി നിറവേറ്റാനും പഠിക്കാം

- രതീഷ് ആർ. മേനോൻ ടെക്, സോഷ്യൽ മീഡിയ വിദഗ്ധൻ

ജി മെയിൽ അക്കൗണ്ടു കൊണ്ടു തുറക്കാനാകാത്ത ഒരു കാര്യവും നമ്മുടെ ഫോണിലില്ല. ഏതു വെബ്സൈറ്റിൽ കയറിയാലും ഓപ്പൺ വിത് ഗൂഗിൾ കൊടുക്കുന്നതോടെ അവരുടെയെല്ലാം പ്രമോഷൻ മെയിലുകൾ ജിമെയിലിൽ വന്നു നിറയും. ഇതിൽ മുങ്ങി പ്രധാനപ്പെട്ട മെസേജുകൾ അറിയാതെ പോകുന്നതിനെ കുറിച്ചു ചിന്തിച്ചു നോക്കൂ. അതിനൊരു പരിഹാരമാണ് ഇക്കുറി.

ജിമെയിൽ കളറാക്കാം

ജിമെയിലിൽ വരുന്ന ഒട്ടനവധി മെയിലുകളിൽ നമുക്കു വളരെ പ്രധാനപ്പെട്ടവ മാത്രം ഒരു പ്രത്യേക നിറത്തിൽ ഹൈലൈറ്റ് ചെയ്തു കാണണമെന്നു തോന്നാറില്ലേ. അതല്ലെങ്കിൽ ഒരു പ്രത്യേക വാക്കുള്ള ഇമെയിലുകളെല്ലാം ഒറ്റ ക്ലിക്കിൽ കാണണമെന്നുണ്ടോ. അതിനുള്ള വഴി ഇതാ.

ആദ്യം ഗൂഗിൾ ക്രോമിൽ ജിമെയിൽ ഓപ്പണാക്കുക. (മൊബൈലിൽ ക്രോം ഓപ്പണാക്കുന്നവർ മെനുവിൽ ഡെസ്ക് ടോപ് സൈറ്റ് എന്നത് എനേബിളാക്കണം. അപ്പോൾ കംപ്യൂട്ടറിലെ പോലെ ജിമെയിൽ ഓപ്പണായി വരും.

ഇടതു വശത്തുള്ള ലേബൽ എന്ന ഭാഗത്തു പ്ലസ് ചിഹ്നം കാണാം. ഇത് അമർത്തുമ്പോൾ വരുന്ന കോളത്തിൽ ഒരു പേരു നൽകുക. ആ ലേബലിന്റെ വലതുവശത്തെ ഡോട്ടുകളിൽ അമർത്തിയ ശേഷം ഇഷ്ടമുള്ള ഒരു കളർ സെലക്ട് ചെയ്ത് കൊടുക്കാം.