തിരുവമ്പാടി കണ്ണനാമുണ്ണി...

വിഷു കഴിഞ്ഞാൽ പൂരമായി. തിരുവമ്പാടി കണ്ണനെ കാണാൻ ഭക്തർ ഒഴുകിയെത്തുന്ന നാളുകളാണ് ഇനി

- ആർ. താര

ഭാവഗായകന്റെ വരികളാണു തിരുവമ്പാടി ക്ഷേത്രത്തിലേക്കുള്ള യാത്രയിൽ കൂട്ടു വന്നത്.

“അമ്പാടി തന്നിൽ ഒരുണ്ണി തിരുവമ്പാടി കണ്ണനാമുണ്ണി... ഉണ്ണിക്ക് തൃക്കൈയിൽ പൊന്നോട കുഴല് കുഴലിൽ ചുരക്കുന്നതമൃത്.

പി.ജയചന്ദ്രന്റെ ഗാംഭീര്യ സ്വരം അമ്പാടി പയ്യിനെ പോലെ മനസ്സിൽ ഓടിക്കളിച്ചു. തേക്കിൻകാടിനു മുകളിലെ ആകാശത്തു സന്ധ്യ തിരിതെളിയുമ്പോൾ തിരുവമ്പാടി കണ്ണനെ കാണാനായി കയറാം എന്നോർത്താണ് ഇറങ്ങിയത്. മറ്റൊന്നു കൂടിയുണ്ട്. തിരുവമ്പാടി ക്ഷേത്രത്തിലെ ഉത്സവം മൂന്നാം നാളാണിന്ന്. ഉത്സവത്തിനു കണ്ണനെ തൊഴാനുള്ള അവസരം കൂടിയായി.

തൃശൂർ റൗണ്ടിൽ തിരക്കിന്റെ പൂരം കൊട്ടിക്കയറുന്നുണ്ട്. ഇത്രയും തിരക്കുള്ള നഗരത്തിനു നടുക്കു തലയുയർത്തി നിൽക്കുന്ന വടക്കുംനാഥക്ഷേത്രവും പാറമേക്കാവും. കുറച്ചപ്പുറത്തായി തിരുവമ്പാടിയും. പോരെങ്കിൽ നഗരത്തിന് ഒത്ത നടുക്കു ജനസാഗരം ഇരമ്പം തീർക്കുന്ന പൂരവും. ഇതൊക്കെ കേരളത്തിലെ മറ്റേതെങ്കിലും നഗരത്തിലുണ്ടാകുമോ?

പുഷ്പ ദീപാലംകൃതമായി മേളമുഖരിതമാണു തിരുവമ്പാടി ക്ഷേത്രം. ഉത്സവത്തിൽ പങ്കെടുക്കാനും ദർശനത്തിനുമായി നാനാഭാഗത്തു നിന്ന് ആളെത്തുന്നു. മേള മണ്ഡപത്തിൽ സംഗീത-നൃത്താർച്ചനകൾ കൊഴുക്കുന്നു. ഇനിയങ്ങോട്ടു വിശേഷദിവസങ്ങളുടെ നിരയാണു തിരുവമ്പാടിയിൽ. ഉത്സവം കഴിഞ്ഞാൽ മേടമാസമായി. മേടച്ചൂടിൽ കണിക്കൊന്നയും തിരുവമ്പാടിയിൽ വിഷുവും പൂരവും ഒന്നിച്ചാണു വിരിയുന്നത്.

ഗുരുവായൂരും തിരുവമ്പാടിയും

ഗുരുവായൂർ അമ്പലത്തിലെ ഉത്സവത്തോടൊപ്പം തന്നെ കൊടിയേറുന്ന ക്ഷേത്രങ്ങളിലൊന്നാണു തിരുവമ്പാടി. ഗുരുവായൂരിലെ ഉത്സവം കൊടിയേറിയ കുംഭം 26നു തന്നെ യാണ് ഇവിടത്തെ കൊടിയേറ്റം. അവിടെ പത്തുദിവസമാണ് ഉത്സവമെങ്കിൽ തിരുവമ്പാടിയിൽ എട്ടുദിവസമേയുള്ളൂ എന്നതാണു വ്യത്യാസം. ഉത്സവത്തിൽ മാത്രമല്ല പൂജകളുടെ കാര്യത്തിലും സമാനതകളേറെയാണ്.