બિપરજોય આફતઃ પોરબંદર, ઓખા, નવલખી વગેરે બંદર પર ભયાનક નવ નંબરનું સિગ્નલ

દ્વારકા-જૂનાગઢમાં લોકોનાં ઘરમાં પાણી ઘૂસ્યાં: PMOની વાવાઝોડા પર બાજ નજર

- 

અમદાવાદ, સોમવાર

બિપરજોય વાવાઝોડું ગુજરાત માટે આફતરૂપ બને તેવી શક્યતા સર્જાઈ છે. આ વાવાઝોડું પોરબંદરથી ૩૪૦ કિ.મી. દૂર પહોંચી ગયું છે. તે ૧૫ જૂને કચ્છના માંડવી અને પાકિસ્તાનના કરાચી વચ્ચે ટકરાઈ શકે તેમ હોઈ હાલમાં પોરબંદર, દ્વારકા, જામનગર, ઓખા, સલાયા, મુંદ્રા, માંડવી અને જખૌ પોર્ટ પર નવ નંબરનું ભયસૂચક સિગ્નલ મુકાઈ ગયું છે. કચ્છમાં દરિયા કિનારા વિસ્તારમાં સાવચેતીના ભાગરૂપે વહીવટીતંત્ર દ્વારા કલમ-૧૪૪ લાગુ કરાઈ છે. આ વાવાઝોડાના પગલે લોકોમાં ભારે ભય ફેલાયો છે અને દરિયા કિનારાના લોકોએ પૂજા-ઉપાસનાઓથી દરિયાદેવને 'ખમ્મા' કરવાની ગળગળા સાદે પ્રાર્થના શરૂ કરી છે.

અરબી સમુદ્રમાં સર્જાયેલું બિપરજોય વાવાઝોડું વધુ ને વધુ વિકરાળ રૂપ લઈ રહ્યું છે. સ્થાનિક હવામાન વિભાગે તા. ૧૫ અને ૧૬ જૂને કચ્છ, જામનગર અને દેવભૂમિ દ્વારકા માટે વરસાદને લઈ રેડ એલર્ટ જાહેર કર્યું છે.