മലമ്പുഴയുടെ തീരങ്ങളിലൂടെ

വാളയാർ കാടിനോട് ചേർന്ന്, കല്ലടിക്കോടൻ മലനിരകളുടെ ഓരത്തുള്ള അകമലവാരം. ആനത്താരയും പുലിമടയുമുള്ള കവയും മലമ്പുഴയും. പാലക്കാട്ടെ വന്യതയിലേക്ക് പലകാലങ്ങളിൽ നടത്തിയ യാത്രകൾ ഓർത്തെടുക്കുകയാണ് ലേഖകൻ

- TEXT & PHOTOS: JYOTHISH KURIAKO

മലമ്പുഴ ഡാമിന്റെ വിശാലമായ ജലപ്പരപ്പിനപ്പുറം അകമലവാരം എന്ന കൊച്ചു ഗ്രാമത്തിന്റെ ദൃശ്യചാരുതയെക്കുറിച്ച് സഞ്ചാരികൾ അറിഞ്ഞുതുടങ്ങിയിട്ട് കാലമേറെയായിട്ടുണ്ടാകില്ല. 'മൃഗയ' സിനിമയിലെ വേട്ടക്കാരൻ വാറുണ്ണിയെയും കാടിറങ്ങിവരുന്ന പുലിയെയുമെല്ലാം ചിത്രീകരിച്ചത് ഇവിടെ വെച്ചായിരുന്നു. വർഷങ്ങൾക്ക് മുൻപ്, എട്ടുമാസവും വെള്ളത്താൽ ചുറ്റപ്പെട്ടു കിടന്ന ഈ ഭൂപ്രദേശത്തേക്ക് എത്തിച്ചേരാൻ ബോട്ട് മാത്രമായിരുന്നു ഏക മാർഗം. എന്നാൽ, ഇന്ന് യാത്രാസൗകര്യങ്ങൾ ഏറെയുണ്ട്.

പലപ്പോഴായി മലമ്പുഴ പിന്നിട്ട് അകമലവാരത്തിലൂടെ സഞ്ചരിക്കുമ്പോൾ പ്രകൃതിയുടെ അനിർവചനീയമായ ദൃശ്യഭംഗിക്കൊപ്പം വന്യമൃഗങ്ങളുടെ സാന്നിധ്യവും കാണാൻ ഭാഗ്യം ലഭിച്ചിട്ടുണ്ട്. മലമ്പുഴ ജലസംഭരണിക്കരികിലൂടെയുള്ള റിങ് റോഡിലൂടെ സഞ്ചരിച്ചാൽ ഈ പ്രദേശത്തിന്റെ മനോഹാരിത സഞ്ചാരികൾക്ക് ആസ്വദിക്കാനാവും. വളവുകളും തിരിവുകളുമുള്ള വഴിയോ രങ്ങളിൽ ചിലപ്പോൾ കലമാനുകൾ കാത്തുനിൽപ്പുണ്ടാവും. മലമടക്കുകളിൽ നിന്നുള്ള കാട്ടുകൊമ്പൻമാരുടെ ചിന്നം വിളികളും പാറക്കെട്ടുകൾക്കുള്ളിൽനിന്ന് പുള്ളിപ്പുലിയുടെ മുരൾച്ചയും ഭയപ്പെടുത്തിയേക്കാം. കുടിയേറ്റ കർഷകരും കൃഷിക്കാരും ആദിവാസി ഗോത്രവിഭാഗങ്ങളും ഉൾപ്പെടുന്നതാണ് ഈ ഗ്രാമത്തിലെ ജനവിഭാഗം. കിഴക്ക് വാളയാർ കാടുകളും പടിഞ്ഞാറ് ധോ ണി-കല്ലടിക്കോടൻ മലനിരകളും വടക്ക് ശിരുവാണി നിത്യഹരിത വനമേഖലയും അതിരിടുന്ന ഈ താഴ്വര വനയാത്രികരുടെ ഇഷ്ട ഭൂമികയാണ്.

മലയോ ജനവാസമേഖലയാകുമ്പോൾത്തന്നെ നിരവധി ജന്തുവൈവിധ്യങ്ങളെ കാണാൻ കഴിയുന്നുവെന്നതാണ് ഈ പ്രദേ ശത്തിന്റെ സവിശേഷത. പരിമിതമായ ജനസാന്ദ്രതയും പശ്ചിമഘട്ട വനമേഖലയോട് അതിരിടുന്ന പ്രദേശമെന്ന പ്രത്യേകതയുമാകാം ഇതിന് കാരണം.