બેજવાબદાર કિસાન નેતાઓ અને તેમનું વિકૃત આંદોલન

દિલ્હીની ચોપાસની સરહદે જમા કિસાન આંદોલનકારીઓએ જાન્યુઆરીના પ્રજાસત્તાક દિવસે ટ્રેક્ટર રેલીના નામે અને તેના ઓઠા હેઠળ પાટનગર દિલ્હીમાં જે ઉત્પાત મચાવ્યો અને લાલ કિલ્લામાં બળજબરીથી દરવાજા તોડી પ્રવેશ કરી ભાંગફોડ કરવા ઉપરાંત દર વર્ષે સ્વાતંત્ર્ય દિને જ્યાં વડાપ્રધાન દ્વારા તિરંગો રાષ્ટ્રધ્વજ ફરકાવવામાં આવે છે ત્યાં અન્ય ધાર્મિક ઝંડો લહેરાવીને જે હરકતો કરવામાં આવી, પોલીસ અને સુરક્ષા દળોના જવાનો પર લાઠી, તલવારથી હુમલા કરવામાં આવ્યા, પથ્થરમારો કરી જે ઉપદ્રવ મચાવવામાં આવ્યો તેનો કોઈ બચાવ થઈ શકે તેમ નથી. લગભગ સવારથી સાંજ સુધી ચાલેલા આ ઘટનાક્રમ દરમિયાન કોઈ કિસાન નેતા તેમને નિયંત્રિત કરવા કે અટકાવવા બહાર આવ્યા નહીં. ટ્રેક્ટર રેલીની ધરાર મંજૂરી, શરતી મંજૂરી મેળવનાર નેતાઓએ શરતોના પાલનની તકેદારી રાખવાની વ્યવસ્થા ન કરી, બલ્ક તમામ શરતોનો ખુલ્લેઆમ ભંગ કર્યો. આ સમગ્ર ઘટનાક્રમનું અર્થઘટન એવું થાય છે કે આંદોલનના નેતાઓએ કોઈ પણ ભોગે ટ્રેક્ટર રેલી માટે મંજૂરી મેળવીને આખરે પોતાનું ધાર્યું કર્યું. ઉપદ્રવીઓને પોતે ઓળખતા નથી એવો આ નેતાઓનો બચાવ પાંગળો છે.