ચહૂદીઓ-મુસ્લિમો વચ્ચેનું ક્રોનિક યુદ્ધ : શાંતિ હારી ગઈ

યુનાઇટેડ નેશન્સમાં ભારત સરકારે ફિલિસ્તીની આરબોના હિતોને ટેકો આપ્યો તેથી વડાપ્રધાન નરેન્દ્ર મોદીના ચાહકો, સોશિયલ મીડિયામાં ભારે નારાજ જણાય છે. દસમી મે, સોમવારે જેરૂસલેમમાં મોટી બબાલ થઈ ત્યાર બાદ જમણેરી હિન્દુઓ માનવા લાગ્યા હતા કે મોદી સરકાર ઇઝરાયલની તરફદારી કરશે. ચીન, પાકિસ્તાન અને ત્રાસવાદીઓના મોરચે લડવામાં ઇઝરાયલની ભારતને નોંધપાત્ર મદદ રહી છે. બાલાકોટ પર થયેલી સર્જિકલ ઍરસ્ટ્રાઇક ઇઝરાયલની મદદ અને શસ્ત્ર સંસાધનોને કારણે સફળ રહી હતી. આવાં આવાં કારણોથી ઇઝરાયલ ભારતીય લોકોનાં દિલોમાં વસી ગયું છે. ફિલિસ્તીની આરબો સાથેના હમણાના ઝઘડાએ ભારતીયોમાં સારી એવી ચર્ચા જગાવી હતી. સૌ કોઈ ઇઝરાયલની તારીફ કરી રહ્યું હતું. સોશિયલ મીડિયામાં એવી પોસ્ટ વહેતી થઈ હતી કે મોદી સરકાર ઇઝરાયલના સમર્થનમાં ઊભી રહેશે. તેઓની અપેક્ષા-ભંગ થયો છે. જોકે ભારત સરકારે ઇઝરાયલની કોઈ ટીકા કરી નથી. બે-રાષ્ટ્રની નીતિને સમર્થન આપ્યું છે, પરંતુ સાથે-સાથે પેલેસ્ટાઇનના હિતોના રક્ષણ માટે મજબૂત સમર્થનની જાહેરાત કરી છે. એક વર્ગ એમ માને છે કે ભારત સરકારને કોઈ મજબૂરી નડી રહી હતી તો તટસ્થ રહેવું હતું. યુનોમાં કોઈ નિવેદન આપવાની જરૂર ન હતી. અહીં પેલું ફેમસ વાક્ય યાદ આવે છે, “કુછ તો મજબૂરી રહી હોગી, યુ નહી કોઈ બેવફા નહીં હોતા.

- આદિત્ય નારાયણ

ખેર! એપ્રિલ મહિનામાં એક બૅરિકેડ, (વાડ કે અંતરાય) ઊભી કરવામાં ઝઘડો થયો અને યહૂદીઓ, ઈસાઈઓ અને મુસ્લિમો એ ત્રણેય કોમ માટે પવિત્ર ગણાતી ભૂમિ પર ઝઘડો થયો. વાત યુદ્ધ સુધી પહોંચી ગઈ. બસ્સોની નજીકની સંખ્યામાં ફિલિસ્તીનીઓ અને આઠેકની સંખ્યામાં ઇઝરાયલીઓ માર્યા ગયા. તેમાં ઇઝરાયલની હૉસ્પિટલમાં નોકરી કરતી મૂળ કેરળની એક નર્સનો સમાવેશ થાય છે.