அதிகரிக்கும் செலவால் முடங்குகிறதா எதிர்கால நகரம்...?

நியோம்... கடந்த ஏழு ஆண்டுகளாக சவுதி அரேபியா நாடு மிகப் பிரம்மாண்டமாக கட்டெழுப்பி வரும் ஓர் எதிர்கால நகரத் திட்டத்தின் பெயர் இது.

- பேராச்சி கண்ணன்

இதில் பிரம்மாண்டம் என்பது வெறும் சம்பிரதாய வார்த்தைகள் அல்ல. ஏனெனில், அத்தனை ஆச்சரியங்கள் நிறைந்த விஷயங்கள் அதனுள் பொதிந்துள்ளன. இதனால், உலக நாடுகள் அனைத்தும் இந்தத் திட்டத்தை வியந்து பார்த்து வருகின்றன.

ஆனால், தற்போது இந்தத் திட்டத்தின் செலவு அதிகரிப்பால் பணிகளில் தாமதம் ஏற்பட, பெரும் தலைவலியைச் சந்தித்து வருகிறது சவுதி அரேபியா. அத்துடன் சுற்றுச்சூழல் மற்றும் மனித உரிமை மீறல்கள் இருப்பதால் பல்வேறு சிக்கல்களையும் எதிர்கொண்டு வருகிறது.

அதென்ன நியோம் (Neom)? கடந்த 2017ம் ஆண்டு சவுதி அரேபியாவின் இளவரசர் முகமது பின் சல்மான், நியோம் என்ற இந்த எதிர்கால நகரத் திட்டத்தைத் தொடங்கி வைத்தார். 'Neom' என்பதிலுள்ள முதல் மூன்று எழுத்துகள் (Neo), 'புதிய' எனும் அர்த்தத்தையும், m என்ற கடைசி எழுத்து இளவரசர் முகமதுவையும் குறிக்கிறது.

உலகின் மிகப்பெரிய எண்ணெய் வளம் கொண்ட நாடு சவுதி அரேபியா. எண்ணெய் ஏற்றுமதியில் முதலிடம் வகிப்பதும் அதுவே.

இந்நிலையில், சவுதி அரேபியாவின் பொருளாதாரம் எண்ணெய் வளத்தை மட்டும் சார்ந்திருப்பதைக் குறைக்க நினைத்தார் இளவரசர் முகமது பின் சல்மான்.

அதனால் பொருளாதாரத்தை பல்வகைப்படுத்துவதற்கும், பொது சேவைத்துறைகளை மேம்படுத்துவதற்கும், அதன்வழி யாக சவுதிக்கு வருமானத்தைப் பெருக்கவும் இந்த எதிர்கால நகரத் திட்டத்தை அவரின் கனவுத் திட்டமாக முன்மொழிந்தார்.

அப்படியாக சவுதி அரேபியாவின் 'விஷன் 2030' திட்டத்தின் ஒரு பகுதியாக இந்த 'நியோம்' திட்டம் செயல்படுத்தப்பட்டு வருகிறது.

இதன்படி பரவலாக உள்ள பாலைவனப் பகுதிகள் சோலை வனமாக மாற்றப்படுகிறது. பாலைவனப் பகுதிகளில் 500 பில்லியன் டாலர் பொருட்செலவில் இந்தத் திட்டம் உருவாக்கப்பட்டு வருகிறது. இது இந்திய மதிப்பில் சுமார் 42 லட்சம் கோடி ரூபாய் ஆகும்.

அப்படியென்றால் எப்படியான திட்டமாக நியோம் உருவாகி வருகிறது என்பதை கணக்கிட்டுக் கொள்ளுங்கள். இதற்காக சவுதியின் வடக்கு முனையில் அகாபா வளை குடாவும், செங்கடலும் சந்திக்கும் பகுதியில் உள்ள நிலப்பரப்பை தேர்ந்தெடுத்துள்ளனர்.

இதன் பரப்பளவு 26 ஆயிரத்து 500 சதுர கிமீ. இது இஸ்ரேல், குவைத் நாடுகளைவிட பெரிய பரப்பளவு ஆகும். அதுமட்டுமல்ல. அல்பேனியா நாட்டின் அளவைக் கொண்டது என்கின்றன தகவல்கள்.