അയാൾ ജീവിക്കുകയാണ്.....

ഫഹദ് ഫാസിൽ എന്ന ഈ അതുല്യനടൻ, മറ്റാരോടും താരതമ്യം ചെയ്യാൻ നമ്മൾ പ്രേക്ഷകർ ആഗ്രഹിക്കാത്ത ഈ അഭിനയവിസ്മയം

അഭിനയം ശരീരം കൊണ്ട് മാത്രമുള്ളതല്ല. സംഭാഷണങ്ങളിലൂടെ മാത്രം അവതരിപ്പിച്ച് കഥാപാത്രത്തെ മെരുക്കിയെടുക്കുന്നിടത്തും അഭിനയം എന്ന കല പൂർണ്ണമാവുന്നില്ല. ശരീരത്തിനൊപ്പം മനസ്സും സഞ്ചരിക്കുമ്പോഴാണ് അഭിനയം പരിപൂർണ്ണമാവുന്നത്. ഒരു തോക്കും കയ്യിൽ പിടിച്ചുകൊണ്ടുള്ള ഫസ്റ്റ് ലുക്ക് പോസ്റ്റർ നമുക്ക് നൽകിയ ആദ്യസൂചനകളെയും തിരുത്തിക്കൊണ്ടാണ് ഫഹദിലെ നടൻ ഇത്തവണ തിയേറ്റർ ഇളക്കിമറിച്ചത്. വിക്രം കഴിഞ്ഞാൽ പിന്നെ ചിത്രത്തിൽ ഏറ്റവും പ്രധാനപ്പെട്ടത്, അതുമല്ലെങ്കിൽ വിക്രത്തിനൊപ്പം തന്നെ സ്ക്രീനിൽ ഇടം പിടിച്ച കഥാപാത്രമായും ഫഹദിന്റെ അമർ എന്ന അന്വേഷണ ഉദ്യോഗസ്ഥനെ വിശേഷിപ്പിക്കാം. ചിത്രത്തിന്റെ ആദ്യപകുതി അമർ സ്വന്തമാക്കി എന്നുപറഞ്ഞാലും തെറ്റില്ല. പതിവുപോലെ തന്നെ ഫഹദിനെ ആരാധകർക്ക് സ്ക്രീനിൽ കാണാനേ കഴിയാത്ത അവസ്ഥ. അമർ എന്ന കഥാപാത്രത്തിലേക്ക് ആഴത്തിൽ ഇറങ്ങിച്ചെന്ന്, രാത്രിയെ ചുറ്റിപ്പറ്റിയുള്ള കഥയിലെ സംശയങ്ങൾ പ്രേക്ഷകരിലേക്ക് കുത്തിവെയ്ക്കുകയായിരുന്നു ഫഹദ്. ചെയ്തുവെന്ന കഥാപാത്രത്തോട് ഇത്രയധികം നീതിപാലിക്കുന്ന നടന്റെ ശരീരത്തോടൊപ്പം മനസ്സും വിയർക്കുന്നു എന്നുപറഞ്ഞാലും അതിശയമില്ല. കാരണം അത്തരത്തിൽ പ്രേക്ഷകന്റെ കണ്ണുകളെ തന്നിൽ നിന്നും, അമർ എന്ന തന്റെ കഥാപാത്രം ഉൾപ്പെടുന്ന രംഗങ്ങളിൽ നിന്നും പറിച്ചുമാറ്റാത്ത വിധം നന്നായി പണിയെടുക്കുകയാണ് ഈ നടൻ.