ഞാൻ റെഡി.നിങ്ങളോ? തന്യ രവിചന്ദ്രൻ

അറുപതുകളിലും എഴുപതുകളിലും തമിഴ് സിനിമയെ അടക്കിവാണ റൊമാന്റിക് ഹീറോയായിരുന്ന രവിചന്ദ്രൻ. അദ്ദേഹത്തിന്റെ കാതലിക്ക് നേരമില്ല എന്ന സിനിമ ഇന്നും പുതുമ നഷ്ടപ്പെടാത്ത ഒന്നാണ്. തന്റെ കുടുംബക്കാർ ആരും തന്റെ പിൻഗാമികളായി സിനിമയിൽ എത്തരുതെന്നും അവർ സിനിമയ്ക്ക് പുറത്ത് പ്രഗത്ഭരാവണം എന്നും ആഗ്രഹിച്ചു അദ്ദേഹം. ഇപ്പോൾ രവി ചന്ദ്രന്റെ ചെറുമകൾ തന്യാ രവിചന്ദ്രൻ തമിഴ് സിനിമയിൽ നായികയായി രംഗപ്രവേശം ചെയ്തിരിക്കുകയാണ്. മുത്തച്ഛന്റെ ശുപാർശയോ പിൻബലമോ ഇല്ലാതെ സിനിമയിലെത്തിയ തന്യാ രവിചന്ദ്രൻ തന്റെ സിനിമാപ്രയാണത്തെക്കുറിച്ച് സംസാരിക്കുന്നു.

- അജയ്കുമാർ

സിനിമാരംഗത നിമാരംഗത്ത് പ്രമുഖനായിരുന്ന മുത്തച്ഛന്റെ പിൻബലമില്ലാതെ തന്യ എങ്ങനെ സിനിമയിൽ എത്തി...

തന്യ: മുത്തച്ഛന് ഞങ്ങൾ നന്നായി പഠിച്ച് വലിയ ആളാകണം എന്നായിരുന്നു ആഗ്രഹം. സിനിമയുടെ പരിസരത്ത് പോലും ഞാൻ വരരുത് എന്ന നിർബന്ധം അദ്ദേഹം വെച്ചുപുലർത്തിയിരുന്നു. ആ കർക്കശം എന്റെ മാതാപിതാക്കൾക്കും ഉണ്ടായിരുന്നു. അതു കൊണ്ട് ഷൂട്ടിംഗ് സ്ഥലത്തുപോലും കൊണ്ടുപോകില്ലായിരുന്നു. സിനിമാ ചാൻസ് ഒരിക്കൽ എന്നെ തേടി വന്നു. മിഷ്കിന്റെ സിനിമയിൽ. അതിൽ ഞാനായിരുന്നു നായിക. മിഷ്കിനായതു കൊണ്ട് വീട്ടുകാർ സമ്മതിച്ചു. അഭിരാമി എന്ന എന്റെ യഥാർത്ഥപേര് സിനിമയ്ക്കുവേണ്ടി തന്യ എന്ന് മാറ്റി. നിർഭാഗ്യവശാൽ മിഷ്കിന്റെ ആ സിനിമ നടന്നില്ല. എന്നാൽ മറ്റ് അവസരങ്ങൾ എന്നെ തേടിയെത്തി. ബാലേ വെള്ളയദേവാ, കറുപ്പൻ, ബൃന്ദാവനം എന്നിങ്ങനെ വരിയായി അവസരങ്ങൾ മുട്ടിവിളിക്കവേ ഞാനും നടിയായി.