ശങ്കർ നിർമ്മാതാവാകുന്ന എഴുത്തോല

കേരളത്തിൽ ആധുനിക വിദ്യാഭ്യാസത്തിന്റെ വളർച്ചയിൽ വിസ്മരിക്കപ്പെട്ടു പോയ, ഒരു കാലത്ത് സമൂഹത്തിൽ നിലയും വിലയുമുണ്ടായിരുന്ന നിലത്തെഴുത്താശ്ശാൻമാരുടെ ജീവിതം പറയുന്ന സിനിമയാണ് എഴുത്തോല.

- എം.എസ്.ദാസ് മാട്ടുമന്ത

അക്ഷരങ്ങൾ അഗ്നിയാവുമ്പോൾ

വിദ്യാലയങ്ങൾ തുടങ്ങുന്നതിന് മുൻപ് അധ്യാപകരുടെ സ്ഥാനത്ത് നിലത്തെഴുത്താശാന്മാരായിരുന്നു എഴുത്തോലയിൽ എഴുത്ത് പഠിപ്പിച്ചിരുന്നത്. കുട്ടികൾക്ക് പനയോലയിൽ ആദ്യക്ഷരങ്ങൾ പകർന്നു നൽകിയ നിലത്തെഴുത്താശാന്മാരുടെ ജീവിതകഥ പറയുന്ന എഴുത്തോലയെന്ന സിനിമ അണിയറയിൽ ഒരുങ്ങുകയാണ്.

തൃശ്ശൂരിലെ ചാലക്കുടിയിൽ നിന്നും പതിനഞ്ച് കിലോമീറ്റർ അകലെയുള്ള ഒരു ഗ്രാമത്തിലാണ് എഴുത്തോലയുടെ ചിത്രീകരണം നടന്നത്. ഞങ്ങൾ എഴുത്തോലയുടെ സെറ്റിലെത്തുമ്പോൾ ധാരാളം ജൂനിയർ ആർട്ടിസ്റ്റുകൾ ഉണ്ടായിരുന്നു. നവാഗത സംവിധായകൻ സുരേഷ് ഉണ്ണികൃഷ്ണൻ മോണിറ്ററിന് മുന്നിലിരുന്ന് മൈക്കിന് മുന്നിൽ പ്രസംഗിക്കാൻ നിൽക്കുന്ന മന്ത്രി കഥാപാത്രമായ ശങ്കറിന്റെ വിവിധ ഭാവങ്ങൾ ചിത്രീകരിക്കുകയായിരുന്നു.

ചിത്രീകരണത്തിന്റെ ഇടവേളയിലാണ് നടനും നിർമ്മാതാവുമായ ശങ്കറിനെ കണ്ടത്. യു.കെ.യിൽ ബിസിനസ്സ് രംഗത്ത് സജീവമായ ശങ്കർ നിർമ്മാണത്തിന് പുറമെ സംവിധാനത്തിലും, അഭിനയത്തിലും സജീവമാണ്. നമ്മുടെ വിദ്യാഭ്യാസ സമ്പ്രദായത്തിന്റെ ആദിമ രൂപമായ നിലത്തെഴുത്താശാന്മാരുടെ കഥ കേട്ടപ്പോൾ ഒരുപാട് ഇഷ്ടമായെന്നും സമൂഹത്തിന് നല്ലൊരു സന്ദേശം നൽകുന്ന കഥയെന്നതിനാലാണ് എഴുത്തോലയുടെ നിർമ്മാണം നിർവ്വഹിക്കാൻ തയ്യാറായി മുന്നോട്ട് വന്നതെന്നും ശങ്കർ പറഞ്ഞു. യു.കെ.യിൽ അഭിഭാഷകനായ സുഹൃത്ത് സുരേഷ് ഉണ്ണിനാണ് എഴുത്തോലയുടെ രചനയും സംവിധാനവും നിർവ്വഹിക്കുന്നതെന്നും ശങ്കർ കൂട്ടിച്ചേർത്തു.