സംവിധായകന്റെ മേലങ്കിയണിഞ്ഞ് വിഷ്ണു ഉണ്ണികൃഷ്ണൻ

വിഷ്ണു ഉണ്ണികൃ ഷ്ണൻ ഇനി സംവിധായകനാണ്. രചനയും അഭിനയവും തനിക്ക് വഴങ്ങുമെന്ന് തെളിയിച്ച വിഷ്ണു  ഉണ്ണികൃഷ്ണന്റെ യാത്രയിൽ സംവിധായനാവുകയെന്നത് സ്വപ്നമായിരുന്നു. തന്റെ ആത്മസുഹൃത്തായ ബിബിൻ ജോർജുമായി ചേർന്നാണ് വെടിക്കെട്ട് എന്ന ചിത്രത്തിലൂടെ വിഷ്ണു സംവിധായകന്റെ മേലങ്കിയണിയുന്നത്.

തിരൂരിൽ നടന്ന സംസ്ഥാന സ്ക്കൂൾ കലോത്സവത്തിൽ മിമിക്രിയിൽ ഒന്നാം സമ്മാനം നേടിയതോടെയാണ് തന്റെ ജീവിതം കലാരംഗത്ത് സമർപ്പിതമാണെന്ന് വിഷ്ണു ഉണ്ണികൃഷ്ണൻ തിരിച്ചറിയുന്നത്.

കൊച്ചിൻ ട്യൂൺസെന്ന മിമിക്രി ട്രൂപ്പിൽ പ്രോഗ്രാം അവതരിപ്പിക്കുമ്പോഴാണ് എന്റെ വീട് അപ്പൂന്റേം എന്ന ചിത്രത്തിലേക്ക് പുതുമുഖങ്ങളെ ആവശ്യമുണ്ടെന്ന് അറിയുന്നത്. വിഷ്ണു സെറ്റിലെത്തിയപ്പോൾ ഡയലോഗുള്ള സീനാണ് വിഷ്ണുവിന് ലഭിച്ചത്. ആദ്യടേക്ക് തന്നെ ഓക്കെയാവുകയായിരുന്നു. ഇതോടെ അമൃതം എന്ന സിനിമയിൽ അഭിനയിച്ച വിഷ്ണു ഉണ്ണി കൃഷ്ണൻ മായാവിയിൽ അഭിനയിക്കാനെത്തി. ഈ ചിത്രത്തിൽ സലിംകുമാറിനോട് പറയുന്ന “ഒന്നു പോടാപ്പ മരമാക്രി പോയി തരത്തിപ്പോയി കളിക്കെടാ.. എന്ന വിഷ്ണുവിന്റെ ഡയലോഗ് വൻ ഹിറ്റായി.