ഇനി ഞാൻ സിനിമയ്ക്കൊപ്പം സന്ധ്യമനോജ്

നർത്തകിയും മോഡലും മോട്ടിവേഷണൽ സ്പീക്കറും യോഗാട്രെയിനറുമൊക്കെയായി വിവിധ മേഖലകളിൽ കയ്യൊപ്പുവെച്ച കലാകാരി സന്ധ്യമ നോജ് ഇപ്പോഴിതാ സിനിമയിലേക്കും കാലെടുത്തുവച്ചിരിക്കുകയാണ്. ബിഗ്ബോസ്സ് ഷോയിൽ ശക്തമായ നിലപാടുകളിലൂടെയും ഉറച്ച ആത്മവി ശ്വാസത്തോടുകൂടിയും മികച്ച പ്രകടനമായിരുന്നു സന്ധ്യ കാഴ്ചവച്ചതെങ്കിൽ ഇനിയങ്ങോട്ട് സന്ധ്യമനോജ് എന്ന മികവാർന്ന നടിയെ വെള്ളിത്തിരയിൽ കാണാം.

- ശരത് സുബ്രഹ്മണ്യൻ

മലേഷ്യയിൽ കുടുംബത്തോടൊപ്പം സ്ഥിരതാമസമാക്കിയ സന്ധ്യ ബിഗ്ബോസ് എന്ന ഷോയ്ക്ക് വേണ്ടിയാണ് കേരളത്തിലെത്തിയത്. ജീവിതത്തിലെ ഏറ്റവും വില പിടിച്ച എഴുപത്തൊന്ന് ദിവസങ്ങൾ. ബിഗ് ബോസ് ദിനങ്ങളെ സന്ധ്യാമനോജ് വിലയിരുത്തുന്നത് അങ്ങനെയാണ്. നൃത്തത്തിന് പുറമേ താൻ നല്ലൊരു അഭിനേത്രി കൂടിയാണെന്ന് സന്ധ്യ പ്രേക്ഷകർക്ക് മുന്നിൽ തെളിയിച്ചു കൊണ്ടിരിക്കുകയാണ്. അനു മേനോൻ കേന്ദ്ര കഥാപാത്രമായി എത്തിയ വരാൽ എന്ന ചിത്രത്തിലൂടെയാണ് അഭിനയരംഗത്തേയ്ക്ക് സന്ധ്യ അരങ്ങേറ്റം കുറിച്ചത്. വരാലിൽ കമ്മീഷണറുടെ വേഷത്തിലാണ് സന്ധ്യ എത്തിയത്. തന്റെ സിനിമാവിശേഷങ്ങൾ പങ്കുവെച്ച് സന്ധ്യാമനോജ്.

ബിഗ്ബോസിൽ നിന്ന് സിനിമയിലേക്ക്

ബിഗ്ബോസിൽ മത്സരാർത്ഥി ആയതിനുശേഷം ജീവിതത്തിൽ ഒരുപാട് മാറ്റങ്ങൾ സംഭവിച്ചു. ഒരു സ്റ്റെപ്പിൽ നിന്ന് അടുത്ത സ്റ്റെപ്പിലേക്കുള്ള യാത്ര. അത് ബിഗ്ബോസിലൂടെ വളരെ എളുപ്പമായിരുന്നു. ഡാൻസറും യോഗ ട്രെയ്നറുമായ എനിക്ക് സിനിമയിലേക്കുള്ള വരവ് വലിയൊരു അനുഭവമാണ് സമ്മാനിച്ചത്. കോലാലമ്പൂർ എയർപോർട്ടിൽ വച്ച് ഒരിക്കൽ അനൂപ് മേനോനെ പരിചയപ്പെട്ടിരുന്നു. ബിഗ്ബോസിൽ നിന്ന് പുറത്തിറങ്ങിയ ശേഷം വരാൽ ചിത്രത്തിന്റെ കാസ്റ്റിംഗ് നടക്കുന്ന സമയത്താണ് അദ്ദേഹമെന്നെ വിളിക്കുന്നത്. ചിത്രത്തിൽ അഭിനയിക്കാമോ എന്ന് ചോദിച്ചു. ഞാൻ വളരെ സന്തോഷത്തോടു കൂടി ചെയ്യാമെന്ന് മറുപടിയും കൊടുത്തു. ആദ്യമായിട്ട് അഭിനയിക്കുന്ന എനിക്ക് ടീമിലുള്ള എല്ലാവരുടേയും പിന്തുണ ലഭിച്ചു.

വരാലിലെ പോലീസ് വേഷം