സർവ്വോപരി പാലാക്കാരൻ

ഷൂട്ടിംഗില്ലാത്തപ്പോൾ വീട്ടിൽ വിശ്രമിക്കുന്ന ദിവസങ്ങളിലും ഓരോ സിനിമയുടെയും സെറ്റിൽ അഭിനയിച്ചുകൊണ്ടിരിക്കുന്നത് സ്വപ്നം കാണും. ഇന്നിത് പറയുന്ന ദിവസവും വെളുപ്പിന് സ്വപ്നം കണ്ടു. മമ്മൂട്ടിയോടൊപ്പം അഭിനയിച്ചു കൊണ്ടിരിക്കുന്നു. കഴിഞ്ഞ ദിവസം സുരേഷ് ഗോപിയുടെ സിനിമ, ഭദ്രൻ ചേട്ടന്റെ സിനിമ, ജോഷി സാറിന്റെ സിനിമ...ഇങ്ങിനെ ഓരോ ദിവസവും പുതിയ പുതിയ സിനിമകളിൽ സ്വപ്നത്തിലൂടെയാണെങ്കിലും അഭിനയിച്ചുകൊണ്ടിരിക്കുന്ന നടൻ.

- ജി.കൃഷ്ണൻ

സിനിമ...സിനിമ...സിനിമ..! ഷൂട്ടിംഗ്. ഷൂട്ടിംഗ്... ഷൂട്ടിംഗ്....

എന്നും, എല്ലാ ദിവസവും സിനിമയിൽ അഭിനയിച്ചു കൊണ്ടിരുന്ന ഒരേയൊരു വ്യക്തി ഒരു പക്ഷേ, ഞാൻ മാത്രമായിരിക്കും.

ഇത് പറയുന്നത് ചലച്ചിത്രനടൻ ചാലി പാലാ. സിനിമ എനിക്ക് വലിയൊരു ഹരമാണ്. ഭ്രമമാണ്. ആ ഭ്രമം കൊണ്ടുതന്നെയായിരിക്കണം ഞാൻ സിനിമയിൽ വന്നതും.

എനിക്കെന്നും സിനിമയുടെ ഷൂട്ടിംഗുണ്ടെന്ന് ചാലി പാലാ പറയുന്നു. അതുപക്ഷെ സ്വപ്നത്തിലാണ്. ഷൂട്ടിംഗില്ലാത്തപ്പോൾ വീട്ടിൽ വിശ്രമിക്കുന്ന ദിവസങ്ങളിലും ഓരോ സിനിമയുടെയും സെറ്റിൽ അഭിനയിച്ചു കൊണ്ടിരിക്കുന്നത് സ്വപ്നം കാണും.

ഇന്നിത് പറയുന്ന ദിവസവും വെളുപ്പിന് സ്വപ്നം കണ്ടു. മമ്മൂട്ടിയോടൊപ്പം അഭിനയിച്ചു കൊണ്ടിരിക്കുന്നു. കഴിഞ്ഞ ദിവസം സുരേഷ് ഗോപിയുടെ സിനിമ, ഭദ്രൻ ചേട്ടന്റെ സിനിമ, ജോഷി സാറിന്റെ സിനിമ...ഇങ്ങിനെ ഓരോ ദിവസവും പുതിയ പുതിയ സിനിമകളിൽ സ്വപ്നത്തിലൂടെയാണെങ്കിലും അഭിനയിച്ചുകൊണ്ടിരിക്കുന്ന നടൻ.

ചാലിയുടെ മനസ്സിൽ ബാല്യകാലത്തുതന്നെ സിനിമ തലയ്ക്കുപിടിച്ചിരുന്നു. അതിനൊരു ഉത്തമ തെളിവും അദ്ദേഹം നിരത്തി. പത്തു വയസ്സുളളപ്പോൾ സ്വന്തം വീടിന് തീപിടിച്ച് കുഞ്ഞനുജൻ തൊട്ടിൽ കിടന്ന് മരിച്ചു. ആ വേദന മനസ്സിൽ നിറഞ്ഞു നിൽക്കുമ്പോഴും ഒരു ക്രിസ്തുമസ് ദിനത്തിൽ കേരളത്തിൽ എം.ജി ആറിന്റെ നാടോടി മന്നൻ എന്ന സിനിമ റിലീസ് ചെയ്തപ്പോൾ വീട്ടിൽ ആരുമറിയാതെ കാണാൻ പോയി.