തിരക്കഥയും കഥാപാത്രവും പ്രധാനം മീന

ഒരു പ്രായം കഴിഞ്ഞാൽ പിന്നെ പെണ്ണുങ്ങൾക്ക് വീട്ടിൽ ഇരിക്കാനേ കഴിയു എന്ന രീതിയിലുള്ള ചിന്തകളെ ഉടയ്ക്കുന്ന ഒരു സിനിമയാണ് "ആനന്ദപുരം ഡയറീസ്

- അപ്പൂസ് കെ.എസ്

ആനന്ദപുരം ഡയറീസ് എന്ന പുതിയ സിനിമയെപ്പറ്റി..?

ഒരു പ്രായം കഴിഞ്ഞാൽ പിന്നെ പെണ്ണുങ്ങൾക്ക് വീട്ടിൽ ഇരിക്കാനേ കഴിയു എന്ന രീതിയിലുള്ള ചിന്തകളെ ഉടയ്ക്കുന്ന ഒരു സിനിമയാണ് "ആനന്ദപുരം ഡയറീസ്.' സിനിമയിൽ ഞാൻ ഒരേ സമയം ഒരു ലോയർ ആയിട്ടും ലോ സ്റ്റുഡന്റ് ആയിട്ടും വേഷമിടുന്നുണ്ട്. പ്രചോദനം നൽകുന്ന ഒരു സിനിമയാണ്.

ഈ കഥാപാത്രം തെരഞ്ഞെടുക്കാനുള്ള കാരണം?

എല്ലാ മനുഷ്യർക്കും എന്നും ജീവിത ത്തിൽ സന്തോഷം മാത്രം ലഭിക്കില്ല. സങ്ക ടങ്ങളും പ്രതിസന്ധി ഘട്ടങ്ങളും ഉണ്ടാകും. ആ ഘട്ടങ്ങളെ നേരിടാൻ പഠിപ്പിക്കുന്നതാണ് ഈ സിനിമ. അതാണ് എന്നെ ആദ്യം ആകർഷിച്ചത്. പിന്നെ നല്ല ഒരു ടീം ആണ്.

സെറ്റ് എങ്ങനെയായിരുന്നു

വയനാട്ടിലെ ഒരു കോളേജിൽ ആയിരുന്നു ഷൂട്ട്. ഒരു കോളേജ് വിദ്യാർത്ഥിയെപ്പോലെ എന്നും കോളേജിൽ പോകുക, വൈകുന്നേരം വീട്ടിൽ വരിക ഇതുതന്നെയായിരുന്നു പണി.

താങ്കളെ സംബന്ധിച്ച് കരിയറും, ജീവിതവും ഒരേസമയം തന്നെയാണ് തുടങ്ങുന്നത്. ജീവിതം തുടങ്ങുന്നത് തന്നെ സിനിമയിലാണ്. ഒരു ബ്രേക്ക് എടുത്ത് എപ്പോഴെങ്കിലും ഇതിൽ നിന്ന് മാറി നിൽക്കണം എന്ന് തോന്നിയിട്ടുണ്ടോ?

ഇല്ല. എനിക്ക് അങ്ങനെ തോന്നിയിട്ടില്ല. കാരണം ഞാൻ ചെയ്യുന്ന ഓരോ കഥാപാത്രങ്ങളും വ്യത്യസ്തമായിരുന്നു.  ഓരോന്നും ഓരോ വേഷമാണ്. പുതിയ കാര്യങ്ങൾ ചെയ്തുകൊണ്ടിരിക്കുക എന്ന ഫീലാണ് ഉണ്ടായിരുന്നത്. പിന്നെ ബ്രേക്ക് എടുക്കണമെന്ന് ചിന്തിക്കാനുള്ള സമയം തന്നെ എനിക്ക് കിട്ടിയിട്ടില്ല. മകൾ ഉണ്ടായതിനുശേഷം ആണ് ഒരു ബ്രേക്ക് എടുക്കണമെന്ന് തോന്നിയത്. ആ സമയത്ത് ദൃശ്യം വന്നു. അത് ഗുണകരമായി.

വർഷങ്ങളോളം ഒരു നടിയെ സിനിമയിൽ കണ്ടുകൊണ്ടിരിക്കുന്നത് പ്രേക്ഷകർക്ക് ചിലപ്പോൾ മടുപ്പുണ്ടാക്കിയേക്കാം. പക്ഷേ താങ്കളുടെ മുഖം പ്രേക്ഷകർക്ക് അങ്ങനെ മടുപ്പ് തോന്നുന്നില്ല. പഴയ പോലെ തന്നെ എപ്പോഴും ആരാധകരും ഉണ്ട്. അതെന്തായിരിക്കും കാരണമെന്ന് എപ്പോഴെങ്കിലും ആലോചിച്ചിട്ടുണ്ടോ?

ആരാധകർ എപ്പോഴും ഉണ്ടായിട്ടുണ്ട്. പക്ഷേ ചെയ്യുന്ന കഥാപാത്രങ്ങളെല്ലാം വ്യത്യസ്തമായതുകൊണ്ടു തന്നെയായിരിക്കണം ഇങ്ങനെയൊരു അംഗീകാരം കിട്ടുന്നത്. പിന്നെയെല്ലാം ദൈവത്തിന്റെ അനുഗ്രഹമാണ്.