ഓഫ് റോഡ് ആറ് സുഹൃത്തുക്കളുടെ കഥ

അഞ്ഞുറിലധികം ആൽബങ്ങൾ, മുന്നൂറ്റിമുപ്പത് ഡോക്യുമെന്ററി lelo, 1200 എപ്പിസോഡുകളിൽ നിരവധി ടി.വി പ്രോഗ്രാം, ഇരുപതിൽ അധികം പരസ്യ ചിത്രങ്ങൾ, ആയിരത്തിലധികം പാട്ടുക ളെഴുതിയിരിക്കുന്നു.... ഇത്രയേറെ അനുഭവസമ്പത്തും പരിജ്ഞാനവുമുള്ള കലാകാരനാണ് ഷാജി സ്റ്റീഫൻ.

- ജി. കൃഷ്ണൻ

മലയാള സിനിമയുടെ ഉപരിതലങ്ങളിൽ നിന്നുകൊണ്ടാണ് മേൽപ്പറഞ്ഞ സൃഷ്ടികളൊക്കെ ചെയ്തിട്ടുള്ളതെങ്കിലും ഇപ്പോൾ ഷാജി സ്റ്റീഫൻ ഒരു മലയാള സിനിമ പുറത്തിറക്കാനുള്ള ഒരുക്കങ്ങളിലാണ്.

പ്രശസ്ത നടൻ ഇന്ദ്രജിത്ത് ആദ്യമായി പാടുന്നത് ഷാജി സ്റ്റീഫൻ സംവിധാനം ചെയ്ത ആൽബത്തിലാണ്. നടി സനുഷ ചെറുപ്പക്കാലത്ത് ആദ്യമായി ക്യാമറയെ അഭിമുഖീകരിച്ചതും ഷാജി സ്റ്റീഫന്റെ ആൽബത്തിലൂടെയായിരുന്നു.

ഷാജി സ്റ്റീഫന്റെ ആദ്യ സിനിമയുടെ പേര് “ഓഫ് റോഡ്. ആറ് സുഹൃത്തുക്കളുടെ കഥയാണ്ഈ സിനിമ പറയുന്നത്. ചെറുപ്പ കാലം മുതൽ കളിച്ചുരസിച്ചുനടന്ന കൂട്ടുകാരാണിവർ.

ഇവരിൽ ഒരാൾ വൈദികനായി മാറുന്നുണ്ട്. ഇടുക്കി ജില്ലയിലെ ഒരു മലയോരദേശത്തെ പള്ളിയിലെ വികാരിയച്ചനായി അദ്ദേഹം ചാർജെടുക്കുന്നത് കൂട്ടുകാർക്കിടയിലും വേറിട്ട ഒരനുഭവമായി മാറിയിരുന്നു. അവരുടെ സന്തോഷവും ആകാംക്ഷയുമൊക്കെ ഏവരും തിരിച്ചറിയുന്നുണ്ടായിരുന്നു.

പുതിയ ദേശത്ത് പുതിയ പള്ളിയിൽ അച്ചൻ ചാർജെടുക്കുന്നത് ഫെയ്സ്ബുക്കിലുമൊക്കെ ലൈവ് പ്രോഗ്രാമായി വന്നപ്പോൾ അത് വൈറലാകുകയും ചെയ്തു.

ആ ദേശത്തെ ഇടവകക്കാർക്കെല്ലാം അച്ചനോട് ഏറെ സ്നേഹവും ബഹുമാനവുമായി. ഏകദേശം അഞ്ചുമാസക്കാലം കഴിഞ്ഞപ്പോഴേക്കും അച്ചൻ അന്നാട്ടിൽ നടന്ന ഒരു കേസ്സിലെ പ്രതിയായി മാറി.

സ്നേഹസമ്പന്നനും സത്യസന്ധനുമായ ഈ പുരോഹിതൻ തെറ്റ് ചെയ്യില്ലെന്ന് കൂട്ടുകാർക്കെല്ലാം ഉത്തമബോദ്ധ്യമുണ്ട്. എന്നാൽ, സമൂഹത്തിനു മുന്നിൽ അച്ചൻ തെറ്റുകാരൻ തന്നെയായിരുന്നു. ഇടവകക്കാരിൽ പലരും അച്ചനെതിരെ വാളോങ്ങി നിന്നു. താൻ തെറ്റ് ചെയ്തിട്ടില്ലെന്ന് തെളിയിക്കാൻ അച്ചന് കഴിയുന്നുണ്ടായില്ല. അത്തരമൊരു ആഴമുള്ള കുരുക്കിലാണ് അച്ചൻ ചെന്നുപെട്ടത്.