അടുത്ത ബെല്ലിൽ നിന്ന് ആക്ഷനിലേക്ക്!!

പതിനെട്ടാമത്തെ വയസ്സ് മുതൽ പ്രൊഫഷണൽ ട്രൂപ്പിൽ തിരക്കിട്ട് നാടകങ്ങൾ ചെയ്തു കൊണ്ടിരുന്ന ഒരു അഭിനേത്രി യുടെ വിദൂരസ്വപ്നങ്ങളിൽ ഒന്നു മാത്രമായിരുന്നു സിനിമ. എന്നാൽ ഇന്ന്, സിനിമയുടെ ലോകത്ത് നല്ല തിരക്കിലാണ് ജയകുറുപ്പ്. ജെല്ലിക്കെട്ട്, ക്രിസ്റ്റഫർ, ഗിർർർ, അയൽവാശി, പേരില്ലൂർ പ്രിമിയർ ലീഗ്, സാജൻ ബേക്കറി, കൊണ്ടൽ, പാൽത്തു ജാൻവർ, ഉള്ളൊഴുക്ക് എന്നിങ്ങനെ പതിനെട്ടോളം സിനിമകൾ ചെയ്തു. ഇനിയും റിലീസ് ആകാൻ പടങ്ങളുണ്ട് ജയയ്ക്ക്.

- രജനി കൃഷ്ണ

സിനിമയിലേക്ക്

നാടകത്തിന്റെ ഒരു സീസൺ കഴിഞ്ഞാൽ, അടുത്ത സീസണിലേക്കുള്ള റിഹേഴ്സലുകൾ, ക്യാമ്പുകൾ ഇതായിരുന്നു ജീവിതശൈലി. അങ്ങനെ ഇരിക്കുമ്പോഴാണ്, ജെല്ലിക്കെട്ട് സിനിമയുടെ ഓഡിഷൻ നടക്കുന്നുണ്ടെന്ന വാർത്ത ഒരു സുഹൃത്ത് വഴി അറിഞ്ഞത്. നാടകനടൻ കൂടി ആയ ഭർത്താവ് ഓഡിഷന് പോകാം എന്നു പറഞ്ഞപ്പോഴേ, പേടികൊണ്ട് ആദ്യം ഒഴിഞ്ഞു മാറാനാണ് ശ്രമിച്ചത്. എന്നാൽ അദ്ദേഹത്തിന്റെ നിർബന്ധം കൂടിയപ്പോൾ പങ്കെടുക്കാം എന്ന് തീരുമാനിക്കുകയായിരുന്നു. പെർഫോമൻസ് കണ്ടു ഇഷ്ടപ്പെട്ട അസോസിയേറ്റ് ഡയറക്ടർ ടിനു പാപ്പച്ചൻ അപ്പോൾ തന്നെ എന്റെ ഫോട്ടോ എടുക്കുകയും ഒരു ബാങ്ക് മാനേജരുടെ റോളിലേക്ക് സെലക്ട് ചെയ്യുകയുമായിരുന്നു. നാടകത്തിൽ നെടുനീളെയുള്ള ഡയലോഗ് വെള്ളം പോലെ പറയുമെങ്കിലും, സിനിമയിൽ എത്തിയപ്പോൾ, ചെറിയ പേടി ഉണ്ടായിരുന്നു. ഒരു ആക്ഷനും കട്ടിനുമിടയിൽ വളരെ സൂക്ഷ്മമായി ഒരു അഭി നേതാവ് കൈകാര്യം ചെയ്യേണ്ട മാധ്യമം ആണ് സിനിമ എന്ന് മനസ്സിലായി. ജെല്ലിക്കെട്ട് സാധാരണ സിനിമ പോലെ ആയിരുന്നില്ല. പോത്തിന്റെ സമയവും അതിന്റെ പെരുമാറ്റവും അനുസരിച്ചുവേണം ഞങ്ങൾ മറ്റ് അഭിനേതാക്കൾ പ്രതികരിക്കാൻ. അത് ഒരു വലിയ അനുഭവം തന്നെയായിരുന്നു.

മലയൻ കുഞ്ഞിൽ ഫഹദിനോടും ഇന്ദ്രൻസേട്ടനോടും ഒപ്പമുള്ള അനുഭവം