ശ്രദ്ധിക്കു ആത്മഹത്യകൾ തടയാം

ഉയരുന്ന ആത്മഹത്യാ നിരക്ക് ഇന്ന് ലോകം നേരിടുന്ന ഏറ്റവും വലിയ വെല്ലുവിളികളിൽ ഒന്നാണ്. ലോകത്ത് ഏത് പ്രായത്തിലുള്ളവരുടേതായാലും മരണകാരണങ്ങളിൽ ആദ്യ ഇരുപതിൽ ഒന്നാണ് ആത്മഹത്യ

- ഡോ. ടി.ആർ. ജോൺ സീനിയർ കൺസൾട്ടന്റ് സൈക്യാട്രിസ്റ്റ് ആസ്റ്റർ മെഡ്സിറ്റി, കൊച്ചി

2003 മുതൽ സെപ്റ്റംബർ 10, ലോക ആത്മഹത്യ വിരുദ്ധ ദിനമായി ആചരിച്ചുവരുന്നു. ഒരു പ്രധാന പൊതുജനാരോഗ്യ പ്രശ്നമായി മാറിയിരിക്കുന്ന ആത്മഹത്യ മൂലമുള്ള മരണങ്ങൾ തടയുന്നതിന് അവബോധം സൃഷ്ടിക്കുന്നതിനും ആഗോളതലത്തിൽ നടപടി സ്വീകരിക്കുന്നതിനുമാണ് ലോകാരോഗ്യ സംഘടനയുടെ സഹകരണത്തോടെ ഇന്റർനാഷണൽ അസോസിയേഷൻ ഫോർ സൂയിസൈഡ് പ്രിവൻഷന്റെ (ഐഎഎ സി) ആഭിമുഖ്യത്തിൽ ഈ ദിനം ആചരിക്കുന്നത്. ആത്മഹത്യക്കെതിരെ ആഗോള ജനതയെ ബോധവൽകരിക്കുന്നതിനും ശാക്തീകരിക്കുന്നതിനും അനുയോജ്യമായ പ്രമേയവും പരിപാടികളുമാണ് എല്ലാ വർഷവും ഈ ദിനത്തിൽ അവതരിപ്പിക്കുന്നത്. ആത്മഹത്യകൾ തടയാൻ ഒരുമിച്ച് പ്രവർത്തിക്കാം' എന്നതാണ് ഈ വർഷത്തെ പ്രമേയമായി തിരഞ്ഞെടുത്തിരിക്കുന്നത്.

ഓരോ സെക്കന്റിലും ആത്മഹത്യ

ഉയരുന്ന ആത്മഹത്യാ നിരക്ക് ഇന്ന് ലോകം നേരിടുന്ന ഏറ്റവും വലിയ വെല്ലുവിളികളിൽ ഒന്നാണ്. ലോകത്ത് ഏത് പ്രായത്തിലുള്ളവരുടേതായാലും മരണകാരണങ്ങളിൽ ആദ്യ ഇരുപതിൽ ഒന്നാണ് ആത്മഹത്യ. ഒരു വർഷം എട്ടുലക്ഷത്തിലേറെ പേർ ആത്മഹത്യ ചെയ്യുന്നുവെന്നാണ് ലോകാരോഗ്യ സംഘടനയുടെ കണക്കുകൾ സൂചിപ്പിക്കുന്നത്. അതായത്, ഓരോ 40 സെക്കന്റിലും ഒരു ആത്മഹത്യ നടക്കുന്നു. വിജയിക്കുന്ന ഓരോ ആത്മഹത്യാശ്രമത്തിനുമിടയ്ക്ക് 25 ഓളം പേർ ആത്മഹത്യയ്ക്ക് ശ്രമിച്ച് പരാജയപ്പെടുന്നുവെന്നും കണക്കുകളുണ്ട്. മറ്റൊരു രീതിയിൽ പറഞ്ഞാൽ എല്ലാ സെക്കന്റിലും ലോകത്തെവിടെയോ ഒരു ആത്മഹത്യയോ ഒരു ആത്മഹത്യാശ്രമമോ നടക്കുന്നുവെന്ന്.

നഷ്ടപ്പെടുന്ന ഓരോ ജീവനും ആരുടെയെങ്കിലും പങ്കാളിയോ കുട്ടിയോ, രക്ഷിതാവോ, സുഹൃത്തോ, സഹപ്രവർത്തകനോ ആകാം. ഓരോ ആത്മഹത്യയും ആ ആളുമായി ബന്ധപ്പെട്ട 135-ഓളം പേരെ മാനസികമായും വൈകാരികമായും തളർത്തുന്നുവെന്നാണ് കണക്കുകൾ. ഇതിനർ ത്ഥം ഒരു വർഷം ശരാശരി പത്തു കോടിയിലേറെപ്പേർ ആരുടെയെങ്കിലും ആത്മഹത്യയുടെ ഫലമായി ബാധിക്കപ്പെടുന്നു എന്നാണ്. ഇങ്ങനെ നോക്കുമ്പോൾ ആത്മഹത്യ മനുഷ്യരാശിയുടെ നില നിൽപിന് തന്നെ അപകടകരമായ ഒരു ഗുരുതര സാമൂഹിക വിപത്താണ്. ദൂരവ്യാപക പ്രത്യാഘാതങ്ങൾക്ക് കാരണമാകുന്ന ഈ സാമൂഹിക വിപത്തിന് എത്രയും വേഗം പരിഹാരം കാണേണ്ടത് അത്യാവശ്യമാണ്. ലോക ആത്മഹത്യാ വിരുദ്ധ ദിനത്തിന്റെ പ്രാധാന്യവും അതാണ്. ആത്മഹത്യ തടയുന്നതിനും അതിനെക്കുറിച്ച് ബോധവൽകരണത്തിനും നമുക്ക് ഒത്തൊരുമിച്ച് പ്രവർത്തിക്കേണ്ടതുണ്ട്.

കേരളത്തിൽ കൂടുതൽ