സ്ത്രീ ആരോഗ്യത്തിന് ആയുർവേദ വഴികൾ

ശാരീരികമായും മാനസികമായും ആരോഗ്യവതിയായിരിക്കാനും സന്തുഷ്ടയായിരിക്കാനും ഓരോ സ്ത്രീയും സമയം കണ്ടെത്തണം. അതിന് മുൻതൂക്കം കൊടുക്കുകയും വേണം

- ഡോ.അഞ്ജന രാമചന്ദ്രൻ സീനിയർഫിസിഷ്യൻ നാഗാർജുനസ്ത്രീആയുർവേദസെന്റർ തൃപ്പൂണിത്തുറ

സ്വസ്ഥവൃത്തം, ആതുരവൃത്തം എന്നിങ്ങനെ ആയുർവേദ പ്രയോഗത്തെ രണ്ടായി ചിട്ടപ്പെടുത്തിയിട്ടുണ്ട്. സ്വസ്ഥന്റെ ആരോഗ്യത്തെ നിലനിർത്തുന്നതിന് സ്വസ്ഥവൃത്തവും, രോഗീ ചികിത്സയ്ക്ക് ആതുരവൃത്തവും.

സ്ത്രീകളുടെ ആരോഗ്യ സംരക്ഷണത്തിന് പ്രത്യേക പ്രധാന്യം കൈവരുന്നത് ചില ഘടകങ്ങൾ കൂടി പരിഗിച്ചാണ്. അതായത് കുടുംബത്തിലെ എല്ലാ അംഗങ്ങളുടെയും ക്ഷേമത്തിന് മുൻതൂക്കം കൊടുത്തു വരുന്ന സ്ത്രീ പലപ്പോഴും സ്വന്തം ആരോഗ്യ പരിരക്ഷയുടെ കാര്യത്തിൽ വിട്ടുവീഴ്ച വരുത്താറുണ്ട്. രോഗലക്ഷണങ്ങളെ അവഗണിക്കുന്ന രീതി, തിരക്കുകൾക്കിടയിൽ പ്രഭാതഭക്ഷണം ഒഴിവക്കുന്ന ശീലം തുടങ്ങി ഒട്ടേറെ കാര്യങ്ങൾ സ്ത്രീകൾ ജീവിതരീതിയുടെ ഭാഗമാക്കാറുണ്ട്. അതിനാൽ ഇത്തരം കാര്യങ്ങളിൽ മാറ്റം വരുത്തി ആരോഗ്യം കാത്തുസൂക്ഷിക്കേണ്ടത് വളരെ പ്രധാനമാണ്. ശാരീരികമായും മാനസികമായും ആരോഗ്യവതിയായിരിക്കാൻ സന്തുഷ്ടയായിരിക്കാൻ ഓരോ സ്ത്രീയും സമയം കണ്ടെത്തണം. അതിന് മുൻതൂക്കം കൊടുക്കുകയും വേണം.

ആരോഗ്യം എന്നാൽ രോഗമില്ലാത്ത അവസ്ഥ മാത്രമല്ല, അതിനുമപ്പുറം ശാരീരികമായും മാനസികമായും ഉള്ള ഒരു സന്തുലിതാവസ്ഥ കൂടിയാണ്. ഇതിൽ ശാരീരിക കർമങ്ങളും മലവിസർജന കർമങ്ങളും, അതിനുപുറമേ പ്രസന്നമായ മനസ്സ്, ഇന്ദ്രിയങ്ങൾ ഇവയെല്ലാം ഉൾപ്പെടും. ഈ പറഞ്ഞിട്ടുള്ള സ്വസ്ഥാവസ്ഥയിൽ എത്താനും ഈ സ്വസ്ഥാവസ്ഥ നിലനിർത്താനും നിരന്തര പ്രയണം ചെയ്യേണ്ടതുണ്ട്. അതിന് സഹായിക്കുന്ന ചികിത്സാപദ്ധതിയാണ് കർക്കടക ചികിത്സ. ഈ ചികിത്സ സ്ത്രീ-പുരുഷ ഭേദമെന്യേ സ്വീകരിക്കാം. സ്ത്രീകൾക്ക് അവരുടെ ജീവിതരീതികൾക്ക് അതിന് യോജിച്ച തരത്തിലുള്ള ആരോഗ്യസംരക്ഷണം ആവശ്യമാണ്.