ഇനി ഞാൻ എന്തുചെയ്യുമെന്ന് ഓർക്കുമ്പോൾ...

നമ്മുടെ ജീവിതത്തിലെ മാറ്റംവരേണ്ട മേഖലകളിലെ ലക്ഷ്യങ്ങൾ ആലോചിക്കുക. അവയുടെ സാധ്യതകളും വരാവുന്ന പ്രതിസന്ധികളും ചിന്തിക്കുക. എത്രയും വേഗത്തിൽ തുടക്കമിടുക

- ഡോ.സെബിൻഎസ്.കൊട്ടാരം കൺസൾട്ടന്റ്സൈക്കോളജിസ്റ്റ് മോട്ടിവേഷണൽട്രെയ്നർ drsebinskottaram.blogspot.com

കോവിഡ്കാലഘട്ടത്തിനു മുൻപ് സ്വന്തമായി ബിസിനസിലേക്ക് തിരിഞ്ഞ വ്യക്തിയാണ് അക്ഷയ്. എന്നാൽ ലോക്ഡൗണും മറ്റുമെല്ലാമായതോടെ ബിസിനസിൽ വരുമാനം കുറഞ്ഞു. പല സാധ്യതകളും നോക്കിയെങ്കിലും അതൊന്നും ഫലവത്താകാതെ വന്നതോടെ ഇനി എന്തുചെയ്യണമെന്ന ചിന്തയിലാണ് അയാൾ.

ഇപ്പോൾ 44 വയസ്സുണ്ട്. ഇനി എന്തെങ്കിലും തുടങ്ങിയാൽ അത് വിജയിക്കുമോയെന്ന ആശങ്കയാണ് മനസ്സിൽ. വർഷങ്ങൾ കടന്നുപൊയ്ക്കൊണ്ടിരിക്കുന്നു. മക്കളുടെ വിദ്യാഭ്യാസം, വിവാഹം ഇതിനൊക്കെ പണം വേണം. തന്റെ തീരുമാനങ്ങൾ ശരിയായിരുന്നോ എന്ന ചിന്ത അയാളുടെ മനസ്സിൽ ഉയർന്നുവന്നു.

ഇത്തരത്തിലുള്ള അനേകരെ കാണാൻ സാധിക്കും. പ്രായം, താൻ ചെയ്താൽ വിജയിക്കുമോയെന്ന ചിന്ത, ഭാവിയെക്കുറിച്ചുള്ള ഉത്കണ്ഠ തുടങ്ങിയവയെല്ലാം പലരുടെയും പ്രവർത്തിക്കാനുള്ള ഊർജം കുറയ്ക്കുന്നു. ഇവിടെ മുന്നോട്ടുള്ള പ്രയാണത്തിന് തടസ്സം, ഒരു കാര്യത്തിന് തുടക്കമിടാനും അത് പൂർത്തിയാക്കാനുമുള്ള ഇച്ഛാശക്തിയുടെ അഭാവമാണ്.

കാലം മാറി. വിപണനരീതികൾ മാറി, തന്റെ അറിവും കഴിവും ഈ മാറ്റത്തിനനുസരിച്ച് പൊരുത്തപ്പെടുമോ, തുടർന്നു വന്ന രീതികളൊന്നും വിജയിക്കുന്നില്ലല്ലോ, അതിനാൽ ഇനി പുതിയതായി തുടക്കമിട്ടാലും കാര്യമുണ്ടോ എന്നെല്ലാമുള്ള ചിന്തയാണ് പലരിലും പല കാര്യങ്ങളും പുതിയതായി ആരംഭിക്കാൻ തടസ്സമായി നിൽക്കുന്നത്. അത് ആരോഗ്യശീലങ്ങളാകാം, പുതിയ ബിസിനസാകാം, പുതിയൊരു കോഴ്സ് പഠിക്കുന്നതാകാം... എന്തുമാകാം.