ആന്തരികസംഘർഷം ഒഴിവാക്കാം

നിങ്ങൾ ശരിയായി യോഗ പരിശീലിക്കുകയാണെങ്കിൽ, ഊർജശരീരം നല്ലതുപോലെ വികസിക്കും. അതിനനുസരിച്ച് നിങ്ങളുടെ ബാഹ്യശരീരവും കർമശരീരവും അതിനെ ഉൾക്കൊള്ളാൻ സജ്ജമായിരിക്കണം

- സദ്ഗുരു ഈശ ഫൗണ്ടേഷൻ

ചില ആളുകളിൽ കർമശരീരവും ഊർജശരീരവും ബാഹ്യശരീരവുമായി സംഘർഷത്തിലാകാറുണ്ട്. എന്തുകൊണ്ടാണ് ഇങ്ങനെ സംഭവിക്കുന്നതെന്നും ഇതിനെ എങ്ങനെ മറികടക്കാമെന്നും ഒരാൾ ചോദിച്ചു. ഒരു വാഹനത്തിന്റെ ഉദാഹരണം കൊണ്ട് ഇക്കാര്യം വ്യക്തമാക്കാം. നിങ്ങൾ ചെറിയൊരു കാറിൽ അതിശക്തമായ എൻജിൻ ഘടിപ്പിച്ചുവെന്ന് വിചാരിക്കുക. അത് പ്രവർത്തിക്കുമ്പോൾ എന്താണ് സംഭവിക്കുക? ചെറിയ കാറിന് ശക്തമായ എൻജിൻ താങ്ങാനാകാതെ തകർന്നുപോകും. അതൊഴിവാക്കാൻ ആ കാറ് മുഴുവനായി ശക്തിപ്പെടുത്തുകയായിരുന്നു വേണ്ടിയിരുന്നത്. എൻജിൻ കേടായതുകൊണ്ടല്ല ആ കാർ തകർന്നുപോയത്. മറിച്ച് എൻജിൻ കൂടുതൽ നല്ലതായതു കൊണ്ടാണ്. അതുപോലെ, നിങ്ങളുടെ ഊർജശരീരത്തിന് ശക്തി കൂട്ടുകയും അതിനനുസരിച്ച് ബാഹ്യശരീരത്തിന്റെ ശക്തി കൂടാതിരിക്കുകയും ചെയ്താൽ, ഇതിൽ ഏതെങ്കിലും ഒന്ന് തകർന്നുപോകും.