പല്ല് നിലനിർത്താൻ റൂട്ട് കനാൽ ചികിത്സ

കേട് ബാധിച്ച പല്ല് നീക്കംചെയ്യാതെതന്നെ പല്ലിലെ പ്രശ്നങ്ങൾ പരിഹരിക്കാനുള്ള മാർഗമാണ് റൂട്ട് കനാൽ ചികിത്സ

- ഡോ.ജയന്ത് നമ്പ്യാർ എൻഡോഡോണ്ടിസ്റ്റ് ചീഫ്ഡെന്റൽസർജൻ ഡോ.നമ്പ്യാർസ്ഡെന്റൽക്ലിനിക് കാഞ്ഞങ്ങാട്

ഒരു വ്യക്തിയുടെ ആരോഗ്യം നിലനിർത്തുന്ന ഘടകങ്ങളിൽ ഏറ്റവും പ്രധാന സ്ഥാനം പല്ലുകൾക്കുണ്ട്. ആരോഗ്യമുള്ള വ്യക്തിയിൽ ഉറച്ച് പല്ലുകളും ആരോഗ്യമുള്ള മോണകളും ഉണ്ടായിരിക്കും. ശരിയായ ദിനചര്യകളും ആഹാരക്രമവും ശുചിത്വരീതികളും ദന്തപരിചരണവും ദന്തരോഗങ്ങളെ ഒരു പരിധി വരെ അകറ്റി നിർത്താൻ സഹായിക്കും. എങ്കിലും അപ്രതീക്ഷിതമായുണ്ടാകുന്ന അണുബാധയോ ആഘാതങ്ങളോ പല്ലുകളുടെ ആരോഗ്യത്തെ അപകടത്തിലാക്കാം. അത്തരം സന്ദർഭങ്ങളിലും സ്വാഭാവിക പല്ലുകളെ കേടുപാടുകൾ തീർത്ത് നില നിർത്തുക എന്നത് വളരെ പ്രധാനപ്പെട്ട കാര്യമാണ്.

സ്വാഭാവിക പല്ലുകളെ ആരോഗ്യത്തോടെ നിലനിർത്താനുള്ള ഒട്ടേറെ നൂതന ചികിത്സാരീതികൾ ഇപ്പോൾ നിലവിലുണ്ട്. അതിൽ പ്രധാനപ്പെട്ട ചികിത്സാരീതിയാണ് എൻഡോഡോണ്ടിക് ചികിത്സ അഥവാ റൂട്ട് കനാൽ ട്രീറ്റ്മെന്റ 

പല്ലിന്റെ വേരിൽ അണുബാധ വന്നാൽ

കേട് ബാധിച്ച പല്ല് നീക്കംചെയ്യാതെ തന്നെ പല്ലിലെ പ്രശ്നങ്ങൾ പരിഹരിക്കാനുള്ള മാർഗമാണ് റൂട്ട് കനാൽ ചികിത്സ. പല്ലിന് പ്രധാനമായും മൂന്ന് ഭാഗങ്ങളാണുള്ളത്. ഇതിൽ പുറമേയുള്ള കവചമാണ് ഇനാമൽ. അതിന് ഉള്ളിലായി ഡെന്റിൻ. അതിന്റെയുള്ളിലാണ് പൾപ്പ് എന്ന ഭാഗം. പൾപ്പിലാണ് പല്ലിലേക്കുള്ള രക്തക്കുഴലുകളും നാഡികളുമെല്ലാമുള്ളത്. പല്ലിനുണ്ടാകുന്ന കേട് ഇനാമലും ഡെന്റിനും കടന്ന് പൾപ്പിലേക്ക് എത്തുമ്പോൾ അണുബാധ വരാനുള്ള സാധ്യത കൂടുന്നു. ഇങ്ങനെ അണുബാധയുണ്ടാകുമ്പോൾ വേദനയനുഭവപ്പെട്ടു തുടങ്ങും. പല്ലിലെ കേട് ഇനാമലും കടന്ന് ഡെന്റീനിൽ എത്തുമ്പോൾ തന്നെ പുളിപ്പ് അനുഭവപ്പെട്ടു തുടങ്ങാറുണ്ട്. ഈ സമയത്ത് പല്ല് അടച്ച് കേട് കൂടുതൽ ഉള്ളിലേക്ക് കടക്കാതെ സംരക്ഷിക്കാനാകും. എന്നാൽ കൃത്യമായ ചികിത്സ തേടാതിരുന്നാൽ കേട് പൾപ്പിലേക്ക് കടന്ന് അണുബാധയുണ്ടാക്കും. ഈ ഘട്ടത്തിലാണ് റൂട്ട് കനാൽ ചികിത്സ നിർദേശിക്കുന്നത്.

പൾപ്പിൽ അണുബാധയുണ്ടായിട്ടും ചികിത്സ തേടിയില്ലെങ്കിൽ അണുബാധ പല്ലിന്റെ വേരിനെ ബാധിക്കും. വേരിന്റെ അടിഭാഗത്ത് പഴുത്ത് കുരുക്കൾപോലെ (Abscess) രൂപപ്പെടുകയും ചെയ്യും. ഇത് പരിഹരിക്കാൻ റൂട്ട് കനാൽ ചികിത്സ മാത്രം മതിയാകില്ല. അപൂർവമായി അത്തരം ഘട്ടത്തിൽ മോണയുടെ ഭാഗം തുറന്ന് അണുബാധയുണ്ടായ ഭാഗം നീക്കംചെയ്യേണ്ടിവരാം. ഈ പ്രക്രിയയെ എപ്പിസെക്ടമി എന്നാണ് പറയുക.

ക്രൗൺ ഇടുന്നത് എന്തിന്