സി.ടി. സ്കാൻ ചെയ്യുമ്പോൾ

 രോഗനിർണയത്തിനും ചികിത്സാ പുരോഗതി വിലയിരുത്തുന്നതിനും സി.ടി. സ്കാൻ ഉപയോഗിക്കാറുണ്ട്. ധമനികൾ, മൃദുലകലകൾ, അസ്ഥികൾ തുടങ്ങിയവയുടെ വ്യക്തതയുള്ള ദൃശ്യം ഇതിലൂടെ ലഭിക്കും

- ഡോ.ഹരിപി.എസ്. സീനിയർകൺസൾട്ടന്റ് എച്ച്.ഒ.ഡി. റേഡിയോളജിവിഭാഗം ആസ്റ്റർമിംകോട്ടക്കൽ

സി ടി. സ്കാൻ യന്ത്രം കണ്ടുപിടിക്കപ്പെട്ടിട്ട് അൻപത് വർഷമായി. തുടക്കത്തിൽ ഒരു സി.ടി. സ്കാൻ പൂർത്തിയാക്കാൻ ദിവസങ്ങളെടുത്തിരുന്നു. പിന്നീടത് മണിക്കൂറുകളുടെ ദൈർഘ്യത്തിലേക്കും ഇപ്പോൾ ഏതാനും മിനിറ്റുകളുടെ ദൈർഘ്യത്തിലേക്കും മാറിക്കഴിഞ്ഞു.

കംപ്യൂട്ടറൈസ്ഡ് ടോമോഗ്രാഫി എന്നാണ് സി.ടി. സ്കാനിന്റെ പൂർണരൂപം. തുടർച്ചയായി ഉത്പാദിപ്പിക്കപ്പെടുന്ന എക്സ്റേ വികിരണങ്ങളുപയോഗിച്ച് ശരീരത്തിന്റെ വ്യത്യസ്തഭാഗങ്ങളിൽ നിന്ന് ആന്തരികാവയവങ്ങളുടെ ദൃശ്യം പകർത്തും. അവ കംപ്യൂട്ടറിന്റെ സഹായത്തോടെ ക്രോസ് സെഷണൽ ഇമേജുകളായി രൂപാന്തരപ്പെടുത്തുകയും ചെയ്യും. സാധാരണ എക്സ്റേയെ അപേക്ഷിച്ച് ധമനികൾ, മൃദുലകലകൾ, അസ്ഥികൾ തുടങ്ങിയവയുടെ വ്യക്തതയുള്ള ദൃശ്യം ലഭ്യമാകാൻ സി.ടി. സ്കാൻ സഹായകരമാകും.

ഇനി പറയുന്ന സാഹചര്യങ്ങളിലാണ് പ്രധാനമായും സി.ടി. സ്കാൻ നിർദേശിക്കാറുള്ളത്. 

അസ്ഥികളെ ബാധിക്കുന്ന കാൻസർ, മുഴകൾ, ക്ഷതങ്ങൾ മുതലായവ തിരിച്ചറിയാൻ.

മുഴകൾ, അണുബാധ, രക്തം കട്ടപിടിക്കൽ തുടങ്ങിയവയുടെ കൃത്യമായ സ്ഥാനം തിരിച്ചറിയാൻ.

ശസ്ത്രക്രിയ, ബയോപ്സി റേഡിയേഷൻ തെറാപ്പി മുതലായവയ്ക്ക് സഹായകരമാകാൻ.

കാൻസർ, ഹൃദ്രോഗങ്ങൾ, ശ്വാസകോശത്തിലെ മുഴകൾ, കരളിലെ മുഴകളും തടിപ്പുകളും മുതലായവ നിർണയിക്കുന്നതിനും നിരീക്ഷിക്കുന്നതിനും.

കാൻസറുൾപ്പെടെയുള്ള ചികിത്സകളുടെ പുരോഗതി നിരീക്ഷിക്കാൻ.