ജനിതക പഠനങ്ങൾ നൽകുന്ന പ്രതീക്ഷ

കാൻസർ മുൻകൂട്ടി കണ്ടെത്താനുള്ള സംവിധാനം ഉണ്ടാക്കുക, പാർശ്വഫലങ്ങൾ ഏറ്റവും കുറഞ്ഞ രീതിയിലുള്ള ചികിത്സാരീതി വികസിപ്പിക്കുക, കാൻസർ കോശങ്ങളുടെ ജനിതകമാറ്റങ്ങളെ പഠിച്ച് അതിന് അനുസൃതമായ ചികിത്സ നൽകുക എന്നിങ്ങനെയുള്ള തരത്തിൽ ഗവേഷണങ്ങൾ മുന്നേറുകയാണ് 

- ഡോ.സതീശൻബാലസുബ്രഹ്മണ്യൻ ഡയറക്ടർ മലബാർ കാൻസർ സെന്റർ തലശ്ശേരി

കാൻസറുമായി ബന്ധപ്പെട്ട ഗവേഷണങ്ങൾക്ക് എത്രത്തോളം പുരോഗതിയുണ്ട്?

കാൻസറുമായി ബന്ധപ്പെട്ട് നിരവധി  ഗവേഷണങ്ങളാണ് ലോകമെമ്പാടും നടന്നുകൊണ്ടിരിക്കുന്നത്. ചികിത്സയിൽ മാത്രമല്ല രോഗ നിർണയ മാർഗങ്ങളിലും ഗവേഷണങ്ങൾ നടക്കുന്നുണ്ട്. കാൻസറിനെ നേരത്തേ കണ്ടെത്തുക എന്നതാണ് കാൻസറിനെ തോൽപ്പിക്കാനുള്ള ഏറ്റവും നല്ല മാർഗം. പക്ഷേ, ഇതിനായി ഏറ്റവും ചെലവ് കുറഞ്ഞതും വളരെ കൃത്യതയുള്ളതുമായ ടെസ്റ്റുകൾ കണ്ടെത്തുക എന്നതാണ് ഏറ്റവും വലിയ വെല്ലുവിളി. അതിനായി ബയോമാർക്കറുകളിലൂടെ കാൻസറിനെ മുൻകൂട്ടി കണ്ടുപിടിക്കാനുള്ള ഗവേഷണങ്ങളാണ് നടക്കുന്നത്. രക്തത്തിലൂടെ സഞ്ചരിക്കുന്ന ചില ഡി.എൻ.എ.കളെ കണ്ടത്തി കാൻസർ മുൻകൂട്ടി കണ്ടെത്താനുള്ള ഗവേഷണങ്ങളാണിത്.

അതേപോലെ ചികിത്സാ സംവിധാനങ്ങളിലും മാറ്റം വന്നു. വളരെ പുരോഗമിച്ച ഘട്ടത്തിലുള്ള കാൻസറുകൾപോലും ചികിത്സിച്ചാൽ ഭേദമാക്കാൻ സാധിക്കും എന്ന അവസ്ഥ വന്നിട്ടുണ്ട്. ഇതുകൂടാതെ കാൻസർ ചികിത്സ കഴിഞ്ഞാൽ സാധാരണ ജീവിതത്തിലേക്ക് അവരെ തിരിച്ചെത്തിക്കാൻ എന്താണ് ചെയ്യേണ്ടത്. അതിന് എന്തൊക്കെയാണ് മാർഗങ്ങൾ എന്നതിനെക്കുറിച്ചും ഗവേഷണങ്ങൾ നടന്നുകൊണ്ടിരിക്കുന്നുണ്ട്.

ഒരേതരം കാൻസർ തന്നെ ഓരോ വ്യക്തിയിലും ജനിതകതലത്തിൽ വ്യത്യസ്തമായിരിക്കും. പേഴ്സണലൈസ്ഡ് മെഡിസിൻ എന്ന തലത്തിലേക്ക് ജീൻ തലത്തിൽ പഠനങ്ങൾ നടത്തി ജനിതകവ്യതിയാനങ്ങൾ എന്താണെന്നും അവയ്ക്കെതിരേ കൃത്യമായ മരുന്ന് ഉപയോഗിച്ച് വലിയ പാർശ്വഫലങ്ങളില്ലാതെ എങ്ങനെ ചികിത്സിക്കാം എന്ന തരത്തിലാണ് ഇന്നത്തെ ഗവേഷണങ്ങൾ മുന്നേറുന്നത്.

ഫലപ്രദമായ രീതിയിൽ രോഗത്തെ മുൻകൂട്ടി കണ്ടത്താനുള്ള സംവിധാനം ഉണ്ടാക്കുക, പാർശ്വഫലങ്ങൾ ഏറ്റവും കുറഞ്ഞ രീതിയിലുള്ള കാൻസർ ചികിത്സാരീതി വികസിപ്പിക്കുക, കാൻസർ കോശങ്ങളുടെ ജനിതകമാറ്റങ്ങളെ പഠിച്ച് അതിന് അനുസൃതമായ ചികിത്സ നൽകുക എന്നിങ്ങനെയുള്ള തരത്തിലാണ് ഗവേഷണങ്ങൾ മുന്നോട്ടു പോകുന്നത്.