കുട്ടികൾ ആരോഗ്യത്തോടെ വളരാൻ

കുഞ്ഞിന് ആരോഗ്യത്തോടെ വളരാനും ബുദ്ധിവികസിക്കാനും ഉയർന്ന സാമൂഹികബോധം നേടാനുമുള്ള സാഹചര്യം ഉണ്ടാകുക എന്നതാണ് പ്രധാനം. അതിനായി ശ്രദ്ധിക്കേണ്ട പ്രധാന കാര്യങ്ങൾ അറിഞ്ഞിരിക്കണം

-  ഡോ.മോഹൻദാസ്നായർ പ്രൊഫനാർ പീഡിയാട്രിക്സ് വിഭാഗം ഗവ. മെഡിക്കൽകോളേജ്, ഇടുക്കി

കുട്ടികൾക്ക് പരമാവധി ആരോഗ്യം - സർവതലസ്പർശിയായ ആരോഗ്യംഉറപ്പുവരുത്തുക എന്നതിനായിരിക്കണം മുൻഗണന നൽകേണ്ടത്. അതിനായി പ്രധാനമായും നടത്തേണ്ട ഇടപെടലുകൾ എന്തൊക്കെയാണ് എന്ന് നോക്കാം.

ആരോഗ്യമെന്നാൽ ഡോക്ടർമാരും ആശുപത്രികളും രോഗചികിത്സയും മാത്രമാണെന്ന ധാരണ മാറ്റുകയാണ് അതിൽ പ്രധാനം. ആരോഗ്യം രോഗമില്ലാത്ത അവസ്ഥ മാത്രമല്ല. മാനസികമായും ശാരീരികമായും സാമൂഹികവുമായ സൗഖ്യമാണത്. കുട്ടികളുടെ കാര്യത്തി ലാണെങ്കിൽ, ഒരു കുഞ്ഞിന് നല്ലരീതിയിൽ വളരാനും ബുദ്ധിവികസിക്കാനും ഉയർന്ന സാമൂഹികബോധം നേടാനുമുള്ള സാഹചര്യമുണ്ടായിരിക്കുക എന്നതാണ്.

രോഗപ്രതിരോധപ്രവർത്തനങ്ങൾക്കാണ് ഇതിൽ പ്രധാനമായും ഊന്നൽ നൽകേണ്ടത്. നാം ഇന്നുനേടിയിട്ടുള്ള ശാസ്ത്രീയമായ വളർച്ച ശരിയായരീതിയിൽ ഉപയോഗപ്പെടുത്തുന്നതിലൂടെ ഇത് നേടിയെടുക്കാം. പ്രധാനപ്പെട്ട ഏഴ് കാര്യങ്ങൾ ഇതിലേക്കായി പരിഗണിക്കാം.

1 കുഞ്ഞിനു വേണ്ടിയുള്ള തയ്യാറെടുപ്പ്: 

ഗർഭധാരണം ആകസ്മികമായി സംഭവിക്കുന്ന ഒരു കാര്യമാകാൻ പാടില്ല. അതിന് പങ്കാളികൾ ആവശ്യമായ തയ്യാറെടുപ്പ് നടത്തണം. അമ്മയാകാൻ തയ്യാറെടുക്കുന്നവർ സ്വന്തം ആരോഗ്യം മെച്ചപ്പെടുത്തണം. അമിതവണ്ണവും തീരെ കുറഞ്ഞ ശരീരഭാരവും ഒരുപോലെ പ്രശ്നമാണ്. പ്രമേഹം, രക്താതിമർദം, തൈറോയ്ഡ് ഹോർമോൺ പ്രശ്നങ്ങൾ, വിളർച്ച തുടങ്ങിയവയുണ്ടെങ്കിൽ നിയന്ത്രിക്കണം. ഗർഭസ്ഥശിശുവിനെ ബാധിക്കാൻ സാധ്യതയുള്ള മരുന്നുകൾ സ്ഥിരമായി കഴിക്കുന്നുണ്ടങ്കിൽ ഡോക്ടറെ കണ്ട്, വേണമെങ്കിൽ ആവശ്യമായ മാറ്റം വരുത്തണം. പുകവലി, മദ്യപാനം എന്നിവയിൽ നിന്ന് വിട്ടുനിൽക്കണം. മാനസികമായ തയ്യാറെടുപ്പ് നടത്തണം. ഇരുവരുടെയും കുടുംബചരിത്രം  (pedigree family tree) വിശദമായി അപഗ്രഥിച്ച്, പിറക്കാൻ പോകുന്ന കുഞ്ഞിന് ജനിതകരോഗങ്ങൾക്കുള്ള സാധ്യതകളുണ്ടോയെന്ന് പരിശോധിക്കണം;ആവശ്യമെങ്കിൽ ഉചിതമായ ലാബ് പരിശോധനകൾ ചെയ്യണം. ഗർഭകാലത്ത് ശ്രദ്ധിക്കേണ്ട കാര്യങ്ങളെക്കുറിച്ച് ശാസ്ത്രീയ അറിവുകൾ സമ്പാദിക്കണം. റുബെല്ലാ വാക്സിൻ, ചിക്കൻ പോക്സ് വാക്സിൻ (മുൻപ് ചിക്കൻപോക്സ് വന്നിട്ടില്ലെങ്കിൽ) എന്നിവ എടുത്തിട്ടല്ലെങ്കിൽ, എടുക്കണം.

ഗർഭസ്ഥശിശുവിന് തലച്ചോറിനും സുഷുമ്നാനാഡിക്കും ഉണ്ടായേക്കാവുന്ന ചില വൈകല്യങ്ങളൊഴിവാക്കാൻ ഫോളിക് ആസിഡ് ഗുളികകഴിച്ചുതുടങ്ങണം. ഇങ്ങനെ ഗർഭധാരണത്തിനുമുൻപ് അനേകം കാര്യങ്ങൾ ചെയ്യാനുണ്ട്.