ഇസ്തംബൂൾ ഒരു മഞ്ഞുകാലത്തിന്റെ ഓർമക്ക്

നിങ്ങളുടെ മുൻകാല ഇഷ്ടങ്ങളെ പരിപൂർണമായും റദ്ദ് ചെയ്യിപ്പിക്കുന്നൊരു മാന്ത്രികതയുണ്ട് ഇസ്തംബൂൾ നഗരത്തിന്. പിന്നീടങ്ങോട്ട് ഇവിടത്തെ ഓർമകൾ നമ്മെ വിടാതെ പിന്തുടരും...

- മൻസൂർ അഹമ്മദ്

ലോകം ഒരൊറ്റ രാജ്യമായിരുന്നെങ്കിൽ ഇസ്തംബൂൾ ആയിരിക്കും അതി ന്റെ തലസ്ഥാനമെന്ന് പറഞ്ഞിട്ടുണ്ട് നെപ്പോളിയൻ ബോണപ്പാർട്ട്. ശരിയാണത്, നിങ്ങളുടെ മുൻകാല ഇഷ്ടങ്ങളെ പരിപൂർണമായും റദ്ദ് ചെയ്യിപ്പിക്കുന്നൊരു മാന്ത്രികതയുണ്ട് ഈ യൂറേഷ്യൻ നഗരത്തിന്. പിന്നീടങ്ങോട്ട് ഇവിടത്തെ ഓർമകൾ നമ്മെ വിടാതെ പിന്തുടരും. മനുഷ്യർ, കാഴ്ചകൾ, രുചികൾ അങ്ങനെ ഓരോ അനുഭവങ്ങളും മറക്കാൻ പറ്റാത്ത സുവനീറുകളായി യാത്രചെയ്യാനുള്ള നമ്മുടെ ത്വരയെ പ്രലോഭിപ്പിച്ചു കൊണ്ടേയിരി ക്കും. ഞാനിപ്പോഴും ആ ഇസ്തംബൂൾ മഞ്ഞുകാലത്തിന്റെ തടവറയി ലാണ്. എത്ര യാത്രാ ഋതുക്കൾ മാറിമറിഞ്ഞുവന്നാലും ഈ ദിവസങ്ങളുടെ സന്തോഷം ഒരു പണത്തൂക്കം മുന്നിൽത്തന്നെ നിൽക്കും.

ഉറക്കവും കഴിഞ്ഞ് നഗരങ്ങൾ ഉണർന്നെണീറ്റു വരുന്നത് അത്രയും ഹൃദ്യമായ കാഴ്ചയാണ്. പതുക്കെ തുടങ്ങി കത്തിപ്പടരുന്നൊരു സംഗീതംപോലെയാണത്. ഒരു യാത്രയിലും പുലർക്കാലങ്ങളെ നഷ്ടപ്പെടാതിരിക്കാൻ ഞാൻ ശ്രദ്ധിക്കാറുണ്ട്. ഇവിടെ മഞ്ഞുകാലം തുടങ്ങിയിരിക്കുന്നു. വൈകിയാണ് സൂര്യൻ ഉദിക്കുന്നത്. ഒമ്പതു മണിയോടെ മാത്രമേ നിരത്തുകൾ കൂടുതൽ സജീവമാകുകയുള്ളൂ. ഏഴുമണിയോടു കൂടി ഞാൻ എഴുന്നേറ്റ് താഴേക്കിറങ്ങും. ആ സമയത്ത് തുറക്കുന്ന വളരെ കുറച്ച് കടകൾ മാത്രമേ ടൊഫേനിൽ ഉള്ളൂ. ഒന്നൊരു ചെറുപ്പക്കാരൻ നടത്തുന്ന ചെറിയൊരു സൂപ്പർ മാർക്കറ്റ് ആണ്. ഓരോ പ്രഭാതത്തിലും ഞാനാദ്യം കാണുന്നത് അവന്റെ ചിരിക്കുന്ന മുഖമാണ്. ഒന്നിച്ചൊരു സിഗരറ്റും വലിച്ച് ഞങ്ങൾ സംസാരിച്ചിരിക്കും. ഗൂഗ്ൾ ട്രാൻസ്ലേറ്റർ മാത്രമാണ് ഞങ്ങൾക്കിടയിലെ അകലം. അടുപ്പവും. ഇന്ന് വൈകുന്നേരം അവന്റെ സഹോദരൻ കടയിലേക്ക് വന്നിട്ട് ബോസ്ഫറസ് വരെ നടക്കാൻ അവൻ കൂട്ടുവരാമെന്ന് പറഞ്ഞിട്ടുണ്ട്. തൊട്ടപ്പുറത്തെ കെട്ടിടത്തിനു താഴെ തെരുവിൽ കിടന്നുറങ്ങുന്ന ഒരു വൃദ്ധനുണ്ട്. അയാൾക്കുള്ള ഭക്ഷണം മൂന്നാമത്തെ നിലയിൽ നിന്നും ഒരു കുട്ടയിൽ കെട്ടിയിറക്കി കൊടുക്കുന്നൊരു മധ്യവയസ്കയെ കാണാം. അയാളത് കരുതലോടെ എടുത്തുവെക്കുന്നു. മിക്ക ദിവസങ്ങളിലും ഞാനത് കണ്ടി ട്ടുണ്ട്. എത്രകാലമായി തുടരുന്നൊ രു സഹായമാവണം അത്. ചില കാഴ്ചകൾ നൊപരം നിറഞ്ഞ സന്തോഷമാണ്. ഇന്നലെ രാത്രി പെയ്ത മഴയിൽ അയാൾ നനഞ്ഞിട്ടുണ്ടാവുമോ! മഞ്ഞുകാലം കഠിനമാവുന്നതിനു മുമ്പേ എവിടെയോ ഒരു അഭയകേന്ദ്രം അയാൾക്കായി ഒരുങ്ങുന്നുണ്ടാവണം. തുർക്കിയയിലെ തണുപ്പ് അത്രക്കും കഠിനമാണ്.

ഇസ്തിക് ലാൽ സ്ട്രീറ്റ്