ചെടിക്കൊരു കളിമൺ ഗുളിക

ചെടിയുടെ വേരുകൾക്ക് ഓക്സിജനും ആവശ്വത്തിന് വെള്ളവും നൽകി ആരോഗ്വത്തോടെ നിലനിർത്തുന്നു ക്ലേ ബോൾസ്

മണ്ണില്ലാതെ ചെടിനടാം എന്നു കേൾക്കുമ്പോൾ കൗതുകം തോന്നും അല്ലേ? നഗരങ്ങളിൽ മാത്രമല്ല ഗ്രാമങ്ങളിലും ഇപ്പോൾ നല്ല മണ്ണ് കിട്ടാൻ പ്രയാസമാണ്. അതുകൊണ്ടുതന്നെ ചെടി നടാൻ മണ്ണിനു പകരം മറ്റ് മാധ്യമങ്ങൾ ഉപയോഗിക്കാറുണ്ട്. ഇൻഡോർ ഗാർഡന്റെ പരിചരണം എളുപ്പമാക്കാൻ ഉപയോഗിക്കുന്ന ക്ലേ ബോൾസ് അത്തരമൊരു മാധ്യമമാണ്.

കളിമണ്ണ് അല്ലെങ്കിൽ ക്ലേ, കുമിള രൂപത്തിൽ വീർപ്പിച്ച് ചുട്ടെടുത്താണ് ക്ലേ ബോൾസ് നിർമിക്കുന്നത്. കുമിളയായതുകൊണ്ടുതന്നെ ക്ലേ ബോൾസിനുള്ളിൽ ധാരാളം വായു അറകൾ ഉണ്ടായിരിക്കും. ഈ വായു അറകളാണ് ക്ലേ ബോൾസിന്റെ ജീവൻ. ഓക്സിജൻ മാത്രമല്ല, വെള്ളവും ഈ സുഷിരങ്ങളിൽ പിടിച്ചു നിൽക്കുമെന്നതിനാൽ ക്ലേ ബോൾസിൽ നട്ട ചെടികൾക്ക് നന ദിവസവും വേണ്ട.