മാവിനെ ചുറ്റി മധുരസ്മരണകൾ

ഹൈവേ വികസനം നഷ്ടപ്പെടുത്തിയ രണ്ട് സെന്റിൽ മുത്തശ്ശിമാവിനു ചുറ്റും നിർമിച്ച വീട് തറവാടിന്റെ ഓർമയ്ക്ക്

ജനിച്ചു വളർന്ന കുടുംബത്തോടൊപ്പം സന്തോഷത്തോടെ ജീവിച്ച പുരയിടവും ഒരുപാട് മുന്നൊരുക്കങ്ങൾ നടത്തി കൊതിച്ചു നിർമിച്ച വീടും ഒരു നിമിഷം കൊണ്ട് അന്യമായിത്തീരുക. ചെറുപ്പത്തിന്റെ ഓർമകൾ പൂർണമായി വടിച്ചെടുത്തുകൊണ്ട് ജെസിബി പാഞ്ഞുപോയത് ജോസി ഫോക്ലോറിന്റെ സന്തോഷത്തിനു മുകളിലൂടെയാണ്. ജോസിയുടെയും ഷീബയുടെയും മാത്രമല്ല, ദേശീയ പാതയോരത്ത് താമസിക്കുന്ന മിക്കവരും ഇതേ ദുരനുഭവങ്ങളിലൂടെയാണ് കഴിഞ്ഞ കുറച്ചു നാളുകളായി കടന്നുപോകുന്നത്.

ദേശീയപാതയ്ക്ക് അഭിമുഖമായി ആലപ്പുഴ പാതിരപ്പള്ളിയിൽ കുടുംബസ്വത്തായി കിട്ടിയ പതിനൊന്ന് സെന്റിൽ കടയും ചെടി നഴ്സറിയും നടത്തി സന്തോഷത്തോടെ കഴിയുകയായരുന്നു ജോസിയും ഷീബയും. തറവാട് പുതുക്കി അഞ്ച് കിടപ്പുമുറികളോടു കൂടിയ പുതിയ വീട് പണിതിട്ട് അഞ്ച് വർഷമാകും മുൻപേ ദേശീയപാത വികസനത്തിന് ഇവരുടെ ഭൂമി ഏറ്റെടുത്തു. ഒൻപതു സെന്റ് ദേശീയ പാതയ്ക്കു നൽകിയപ്പോൾ ബാക്കിയായത് 2.3 സെന്റ് മാത്രം  സ്വന്തം മണ്ണ് ഉപേക്ഷിച്ച് മകൾക്കരികേ, കൊല്ലത്ത് പുതിയ വീടുവച്ച് ജീവിക്കാം എന്നു തീരുമാനമെടുത്തു ജോസിയും ഷീബയും. എന്നാൽ വിധി കരുതി വച്ചത് മറ്റൊന്നായിരുന്നു. പോയി കണ്ട സ്ഥലങ്ങൾ വില ഒക്കാതെ വന്നപ്പോൾ ബാക്കിയുള്ള സ്ഥലത്തുതന്നെ വീടുവയ്ക്കാം എന്ന തീരുമാനത്തിലെത്തി. വനിത വീടിന്റെ വലിയ ആരാധികയായിരുന്ന ഷീബയാണ് "ഡിയോ എഎഫ്' എന്ന ആർക്കിടെക്ചർ സ്റ്റുഡിയോ തിരഞ്ഞെടുത്തത്. ചെറിയ സ്ഥലത്തും നല്ല വീട് വയ്ക്കാനാകും എന്ന് ഡിസൈനർ രമേഷ് കൃഷ്ണൻ നൽകിയ ഉറപ്പ് ഈ ദമ്പതികൾക്ക് ആശ്വാസമേകി.

ചെറിയ കുടുംബത്തിന് ചെറിയ വീട്