പത്തു ലക്ഷത്തിനു പത്തരമാറ്റ് വീട്

നിർമാണവസ്തുക്കളുടെ വിവേകപൂർവമായ ഉപയോഗത്തിലൂടെ ചെലവ് കൈപ്പിടിയിലൊതുക്കി

ഒരു രൂപ പോലും പാഴാക്കാതെ വീടു പണിയുക ജയകുമാറിനെയും കുടുംബത്തെയും സംബന്ധിച്ച് ഇതൊരു ആലങ്കാരിക പ്രയോഗമായിരുന്നില്ല; അത്യാവശ്യവും ജീവിതയാഥാർഥ്യവുമായിരുന്നു. കോട്ടയം നെടുങ്കുന്നത്ത് ഓട്ടോ ഡ്രൈവറായ ജയകുമാർ മിച്ചം പിടിക്കുന്ന ചെറിയ തുക സ്വരുക്കൂട്ടി വയ്ക്കാൻ തുടങ്ങിയിട്ട് കുറച്ചു വർഷങ്ങളായി. പണത്തിന്റെ മൂല്യത്തെയും നിർമാണച്ചെലവിനെപ്പറ്റിയും നല്ല ധാരണയുണ്ടായിരുന്നതിനാൽ കുറഞ്ഞ ചെലവിൽ വീട് നിർമിക്കുന്നതിനെപ്പറ്റിയുള്ള അന്വേഷണവും സമാന്തരമായി നടന്നു. സവാരി പോകുന്നതിനിയിൽ കണ്ണിൽപ്പെടുന്ന ചെറിയ വീടുകളെല്ലാം ശ്രദ്ധിക്കും. കഴിയുന്നിടത്തെല്ലാം ഇറങ്ങി വിവരങ്ങൾ തിരക്കും. അങ്ങനെയാണ് നെടുങ്കുന്നത്ത് പുതിയതായി പണിത വീട് കാണുന്നതും അതു നിർമിച്ച കോസ്ഫോർഡിനെ ബന്ധപ്പെടുന്നതും.

നിലവിൽ താമസിച്ചിരുന്ന ആസ്ബറ്റോസ് ഷീറ്റ് മേഞ്ഞ വീട് ചോർന്നൊലിക്കുന്ന സ്ഥിതിയിലായിരുന്നതിനാൽ എത്രയും പെട്ടെന്ന് പുതിയൊരു വീട് വേണം എന്ന ആവശ്യവുമായാണ് ജയകുമാർ കോസ്റ്റ്ഫോർഡിന്റെ കോട്ടയത്തെ ഓഫിസിലെത്തുന്നത്.

നല്ലത് നിലനിർത്തണം

എൻജിനീയർ ബിജു പി. ജോണിന്റെ നേതൃത്വത്തിൽ വൈകാതെ തന്നെ സ്ഥലം സന്ദർശിച്ചു. നിലവിലെ വീടിന്റെ കുഴപ്പമില്ലാത്ത ഭാഗങ്ങൾ നിലനിർത്തണം എന്നൊരു ആഗ്രഹം ജയകുമാറിനുണ്ടായിരുന്നു.